Heilsu kvennaferð

Ferðin er fyrir konur á öllum stigum breytingaskeiðsins, sem og þær sem vilja undirbúa sig fyrir þann tíma og læra að skilja betur hvernig líkaminn starfar. Í gegnum ferðina er farið yfir mikilvægi svefns fyrir líðan, hreyfingu sem styður við hormónakerfið og mataræði sem getur hjálpað til við að draga úr bólgum og auka orku. Einnig er fjallað um sogæðameðferðir, áhrif streitu og mikilvægi sjálfsmyndar og endurnýjunar. Allt er þetta gert á afslappaðan, styrkjandi og raunhæfan hátt þar sem markmiðið er að hver og ein kona geti fundið leiðir sem henta henni sjálfri.

Dagskráin byggir á jafnvægi milli fræðslu, hreyfingar, slökunar og samveru. Boðið verður upp á létta æfingatíma þar sem lögð er áhersla á styrk, liðleika og djúpöndun, ásamt útiveru þar sem gengið er í náttúrunni og notið sólar, sjávar og fersks lofts. Fræðslustundir og opnar umræður gefa þátttakendum tækifæri til að vinna með eigin markmið og ræða hvernig hægt er að láta sér líða sem best í eigin líkama. Jafnframt verður lögð áhersla á slökun, svefnhugleiðingar og sjálfsumhyggju, auk þess sem gleði, hlátur og tengsl á milli kvenna verða mikilvægur hluti af upplifuninni.

Markmið ferðarinnar er að þátttakendur snúi heim með meiri orku, skýrari sýn og raunhæf markmið fyrir framhaldið. Þær fái verkfæri sem nýtast áfram í daglegu lífi, ný tengsl og aukið sjálfstraust. Mikilvægast af öllu er þó að hver kona finni að hún er ekki ein á sinni vegferð.

Ferðinni stýrir Sandra Lárusdóttir, stofnandi fyrirtækisins Heilsa og Útlit sem hefur starfað frá árinu 2014. Hún hefur víðtæka reynslu og hefur sérhæft sig meðal annars sem einkaþjálfari, Bowentæknir, í sogæðameðferðum og medical tattoo. Hún er einnig vottaður breytingaskeiðsmarkþjálfi og hefur lagt áherslu á að styðja konur í að bæta heilsu, vellíðan og sjálfstraust.

Tenerife hefur allt það að bjóða sem bestu sólarstaðir státa af. Eyjan er þekkt fyrir einstaka veðursæld, hreinar strendur og fjölbreytta afþreyingu fyrir alla aldurshópa.

Fjölskyldur geta notið alls þess sem eyjan hefur upp á að bjóða og í boði er fjöldi gististaða fyrir allar fjölskyldustærðir – allt frá íbúðum upp í stórglæsileg hótel. Bókaðu í tíma til að tryggja gistingu sem hentar þér og þinni fjölskyldustærð.

Ekki má gleyma að á Tenerife er flottasti vatnsrennibrautagarður heims, „Siam Park“, ásamt hinum stórglæsilega dýragarði „Loro Parque“.

Það skemmta sér allir vel á paradísareyjunni Tenerife!

TENERIFE SUR – SUÐURHLUTINN

Á suðurhluta Tenerife skín sólin nánast alla daga ársins og þar er vinsælast að vera. Úrval Útsýn býður upp á gistingu á suðurhlutanum í Playa de las Américas, Los Cristianos og Costa Adeje. Allir þessir staðir hafa sinn sjarma og sitt einstaka andrúmsloft. Í Los Cristianos slær hjarta suðurhlutans þar sem ferðamannaiðnaðurinn byrjaði. Á því svæði búa eyjaskeggjar Tenerife en gamli bærinn er afar sjarmerandi með litlum þröngum göngugötum, flottum kaffihúsum, börum og úrvali verslana. Playa de Las Americas hefur að geyma hinn svokallaða “Laugaveg” en þar er frábært úrval verslana og veitingastaða á heimsmælikvarða. Costa Adeje svæðið er svo yndislegt og rólegt, með fallegum ströndum og stórglæsilegum gistingum.

SANTA CRUZ – HÖFUÐBORGIN

Santa Cruz er höfuðborg Tenerife og hún er staðsett við sjávarsíðuna á norð-austur hluta eyjunnar, undir fjöllum Anaga tangans. Þetta er glaðleg heimsborg, full af orku, og litast af persónuleika eyjaskeggja. Í borginni, sem er samvaxin La Laguna, er ótal margt að skoða en samanlagt búa þar yfir 400 þúsund manns sem gerir þær að stærsta þéttbýlissvæði Kanaríeyja. Borgin hentar sérstaklega vel til gönguferða. Hún er þakin fallegum görðum, flottum verslunargötum og býður upp á alla þá kosti sem stórar heimsborgir státa af. Hér er að finna mjög áhugaverðan byggingarstíl gömlu tímanna, samofinn nýjum stefnum og straumum arkítektúrs 21. aldarinnar. Santa Cruz er sú borg Spánar sem státar af flestum nútíma byggingum á litlu svæði. 

Menningarlíf borgarinnar er talið einstakt enda mikið af áhugaverðum söfnum og listsýningum á heimsmælikvarða. Fyrir tónlistarunnendur er sinfóníuhljómsveit borgarinnar í fremstu röð Evrópuþjóða. Borgin er byggð upp við fallegar breiðgötur, svo kallaðar „Ramblas“. Í borginni er skemmtilegt andrúmsloft, sem er bæði róandi og seiðandi, án þess að missa hið skemmtilega yfirbragð lítillar heimsborgar. Hér eru frábærar verslanir, verslunarmiðstöðar, veitingastaðir og kaffihús. Í næsta nágrenni er einnig stærsta og glæsilegasta strönd eyjunnar „Las Teresitas“. Í einungis 15 mínútna ferð með sporvagni er komið til hinnar þekktu 500 ára gömlu fyrrverandi höfuðborgar Tenerife, La Laguna, sem er á heimsminjaskrá UNESCO fyrir einstaka sögu og fallegar byggingar. 

PUERTO DE LA CRUZ – NORÐURHLUTINN

Puerto de la Cruz er staðsett á norðurhluta eyjunnar og er einna þekktust fyrir að hýsa einn glæsilegasta dýragarð Evrópu, Loro Parque. Ferðalangar hafa heimsótt þessa einstöku borg frá Evrópu síðan um miðja 19. öld og er fyrsti eiginlegi sumarleyfisdvalarstaður Kanaríeyja. Borgin hefur yfir sér rólegt yfirbragð þar sem gamli og nýi tíminn mætast á mjög sjarmerandi máta.

Gamli bærinn státar af afar fallegum gömlum byggingum og höfnin sem er í lykilhlutverki þjónaði vínútflutningi frá La Orotava dalnum í nokkur hundruð ár. Bærinn La Orotava er verðugur áningastaður þar sem eru stórglæsileg hús og hallir ásamt kirkjum sem skreyta bæinn. Við sjávarsíðuna er svo að finna afar fallegan sundlauga- og lystigarð, Lago Martiánes, sem þjónar borginni sem einskonar strandgarður, því fáar baðstrendur eru við borgina.

Í Puerto de la Cruz er einnig að finna mikið af skemmtilegum verslunum, en til að mynda er þar stærsta verslunarmiðstöð eyjunnar, La Villa sem er staðsett rétt fyrir utan bæinn. Einnig er þar elsti skrúðgarður (Botanical Garden) Tenerife. Fallegar göngugötur, torg og garðar toppa svo þessa fallegu borg. Hér er mikið úrval af glæsilegum veitingastöðum, börum og kaffihúsum, bæði í gamla bænum sem og í næsta nágrenni hans. 

Puerto De La Cruz er klárlega staður sem vert að skoða!

AFÞREYING Á TENERIFE

Á daginn þarf enginn að láta sér leiðast enda nóg við að vera fyrir unga jafnt sem aldna. Gaman er að heimsækja einn glæsilegasta vatnsrennibrautagarð Evrópu, Siam Park, þar sem þú getur meðal annars rennt þér niður 28 metra rennibraut nánast í frjálsu falli sem endar með ferð í gegnum hákarlabúr! Eða farið á stærstu go-kart braut Evrópu.

Við nánast hverja strönd á Tenerife er mikið úrval vatnaíþrótta -> sjóskíði, bananabátar, siglingar og köfun svo eitthvað sé nefnt.