Fegurð Króatíu

Beint flug með Play til Split. Brottför kl.14:50 frá Keflavík, lending á Split flugvelli kl.21:35 að staðartíma.
Rúta flytur hópinn á Hotel Mondo í Split (u.þ.b. 25 mín akstur) en þar verður boðið upp á kvöldhressingu áður en gengið verður til náða.

Að morgunverði loknum, um kl. 09.30 verður lagt af stað í skoðunarferð um Split sem er önnur stærsta borg Króatíu.
Í Split má meðal annars finna rúmlega 1700 ára gamla höll rómverska keisarans Diocletian, en höll þessi var notuð sem tökustaður í Game of Thrones á sínum tíma. Þröngar götur með tónlistarmönnum, skemmtilegir barir og litlar verslanir, götulistafólk og margt fleira ber fyrir augu í þessari fallegu borg. Um hádegisbil gefst frjáls tími til að snæða hádegisverð (hádegisverður er ekki innifalinn) og eftir það er frjáls tími til kl.16 en þá fer rútan tilbaka á hótelið.
Þeir sem vilja vera lengur í miðbænum geta gert það og tekið leigubíl tilbaka á hótelið (um 15 mín. akstur).
Kvöldverður á hóteli innifalinn.

Eftir morgunverð skráir hópurinn sig út af Hotel Mondo og fer með rútu sem leið liggur til bæjarins Trogir. Þar verður farið í skemmtilega skoðunarferð um bæinn og einnig gefst frjáls tími til að rölta um og snæða hádegisverð (hádegisverður ekki innifalinn). Kl.13:30 heldur rútan áfram til Vodice þar sem hópurinn mun dvelja á Hotel Olympia Sky, við ströndina, í glæsilegum herbergjum með sjávarsýn.
Áætluð koma á hótelið er um kl.14:30 – 14:45.
Frjáls tími það sem eftir lifir dags og kvöldverður innifalinn á hóteli.

Eftir morgunverð safnast hópurinn saman í anddyri hótelsins og verður lagt af stað kl.9:30 til bæjarins Šibenik
sem er í um 20 mín. fjarlægð. Šibenik er í Dalmatíuhéraðinu, en héraðið dregur nafn sitt af illýrskum ættbálki sem kallaðist Dalmatae, og bjó á svæðinu í fornöld. Síðar varð þetta rómverskt hérað en seint á 6.öld komu Slavar og Króatar sem að lokum hertóku svæðið.
Skoðunarferð um þessa fallegu og fornu borg stendur yfir frá kl.10 til 11:30 með leiðsögumanni, en eftir það er frjáls tími til kl.15.
Steinilagðar götur liðast milli aldagamalla bygginga og er elsti hluti borgarinnar algjörlega lokaður bílaumferð þar sem göturnar og húsasundin eru allt of þröng til að bílar komist þar um. Sannkölluð miðaldastemning og skal engan undra að hér voru einnig mörg atriði tekin upp fyrir Game of Thrones.
Rúta tilbaka til Vodice kl.15:30 og frjáls tími það sem eftir lifir dags.
Kvöldverður innifalinn á hóteli.

Hægt er að kaupa einkar skemmtilega skoðunarferð til Etnolad Pakovo með siglingu og vínsmökkun. https://etnoland.com/ Ferðin er keypt sérstaklega í kaupferlinu en einnig er hægt að bæta henni við eftirá. Síðasti dagur til að bóka ferðina er 15.september.
Dagskrá skoðunarferðar:
Lagt er af stað kl.10 og keyrt til Etnoland þar sem verður farið í heimsókn til íbúa og fáum við að fræðast um hvernig fólk bjó og lifði í Dalmatíu fyrir mörg hunduð árum. Við fáum að smakka hið fræga Drniš “pršut” sem er hráskinka þeirra Króatíubúa svipað og Prosciutto Ítalíumanna og Jamón Ibérico Spánverja. Einnig verður boðið upp á vín úr héraðinu ásamt brauði og fá gestir þannig innsýn inn í líf Dalmatíubúa hér áður fyrr. Skemmtileg skoðunarferð um þorpið áður en endað verður í “all you can eat” hádegisverðar hlaðborði að hætti Króata.
Eftir hádegisverð verður farið í þjóðgarðinn Krka þar sem fegurðin er einstök. Gengið verður ásamt leiðsögumanni að Krka fossunum en þeir eru einstaklega fallegir og gefst frjáls tími að gönguferðinni lokinni.
Kl.15 er komið að stuttri siglingu til Skradin þar sem við skoðum okkur um áður en farið verður um borð í rútuna og haldið til Baraka í vínsmökkun. Þar fáum við að smakka þrenns konar vín sem framleidd eru á Baraka vínekrunni.
Um kl.17:30 verður haldið til baka á hótelið (u.þ.b. 10 mín akstur) og slakað á fyrir kvöldmat sem er innifalinn á hótelinu.

Kl. 09:40 röltir hópurinn saman að höfninni neðan við hótelið og farið verður í skemmtilegt eyjahopp! Einstök fegurð og skemmtileg ferð! Hádegisverður er innifalinn um borð og ef veður leyfir verður stoppað þar sem hægt er að fá sér sundsprett. Eyjurnar Zlarin og Prvic verða heimsóttar ásamt Šibeniksundi. Komið tilbaka að hóteli kl.15:30.
Kvöldverður innifalinn á hóteli.

Morgunverður og frjáls dagur. Rúta flytur hópinn á flugvöllinn kl.19 en fram að því er frjáls tími. Hægt verður að geyma farangur á hótelinu eftir að búið er að skrá alla út og njóta dagsins fram að brottför. Brottför frá Split flugvelli kl.22:35, lending í Keflavík kl. 01:40 að staðartíma.