Sapa & Halong

Ferðin hefst í höfuðborginni Hanoi þar sem nútíminn blandast saman við gamla siði þannig að niðurstaðan verður ákaflega lifandi og skemmtileg borg. Á fyrsta degi er farið í hálfsdags skoðunarferð um borgina með viðkomu á mörgum áhugaverðustu stöðum borgarinnar, en einnig gefst tími til að njóta borgarinnar í rólegheitum. 

Eftir nótt í Hanoí er haldið áfram að skoða borgina og kynnast Víetnam á öðrum degi í landinu en að kvöldi er lagt af stað með næturlest upp til fjalla Sapa. Bærinn Sapa er í 1500 metra hæð í Norður Víetnam og er þekktur fyrir náttúrufegurð, víðfeðmt útsýni yfir grænt fjalllendi og hrísgrjónaakra en tíð fjallaþoka svipar bænum draumkenndum blæ og er því draumur margra ljósmyndara.

Þó svo að Sapa sé sífellt að verða vinsælli ferðamannastaður hefur svæðið ekki tapað sjarma sínum. Þar koma saman ólíkir ættbálkar úr nágrenninu og selja og skiptast á vörum. Mest áberandi er Dao ættbálkurinn en konurnar eru auðþekkjanlegar á stórum rauðum höfuðfötum. Aðrir ættbálkar sem búa á svæðinu og koma til Sapa eru Hmong, Thai, Giay, Tay, Muong, Hao og Xa Pho. Konur og börn sem koma reglulega til bæjarins tala oft merkilega góða ensku og eru allir ákaflega brosmildir og vinalegir.

Lao Cai nefnist bærinn þaðan sem göngurnar hefjast og er í samnendu héraði. Þetta er góður upphafspunktur til að kanna gullfallegt landslagið og fjölbreytileika mannlífs á svæðinu. Gengið er í 6 daga í gegnum hrísgrjónaakra, skógi þakin svæði og í gegnum lítil þorp þar sem litríkir ættbálkar svæðisins búa. Gist er í fjórar nætur í heimagistingum í mismunandi þorpum þar sem göngugarparnir njóta þess að snæða með heimamönnum og fá þannig innsýn inn í hefðbundið líf ættbálkanna.

Eftir að gönguferðinni lýkur heldur áfram mögnuð upplifun á náttúru og fegurð Norður Víetnam þegar dvalið er í Pu Luong og Ninh Binh sem ekki síður draumkennt umhverfi og áfram gefst kostur á nálægð við heimafólk og framandi siði.

Síðasti áfangi ferðarinnar er þriggja daga sigling á hinum rómaða Halongflóa sem er frægur fyrir gullfallega skógivaxna kalksteinskletta sem rísa upp úr sjónum eins og risavaxnir skúlpútrar og búa til landslag sem maður þarf að sjá með eigin augum til skilja fegurðina. Það er þó ekki bara setið auðum höndum á siglingunni heldur er stoppað til að skoða strendur og hella og hægt er að sigla á kajökum eða synda við bátinn á meðan áhöfnin setur upp veisluborð með víetnömskum kræsingum.

Þessi fjölbreytta ferð er einstök upplifun þar sem skyggnst verður inn í daglegt líf ættbálka í Víetnam, gengið og siglt um einstakt landslag Norður Víetnam. Óhætt er að segja að ferðin er við hæfi allra fullfrískra þó svo að vissulega komi hún til með að reyna á í göngunum.

Höfuðborg Víetnam, Hanoí, bíður ferðalanga aftur þegar siglingu lýkur og gefst þá tækifæri til að rannsaka og njóta þeirrar perlu betur.

Kjarni ferðarinnar

Stórborgin Hanoí með musteri, leikhús og hallir. 6 daga gönguferð í fjalllendi norður víetnam umkringd hrísgrjónaökrum og fallegu landslagi. Fámennir ættbálkar heimsóttir þar sem gist verður í heimagistingu og kvöldverður snæddur hjá innfæddri fjölskyldu. Lúxus þriggja daga sigling um Halongflóa sem þekktur er fyrir gullfallega skógivaxna kalksteinskletta.