Velkomin til Krabi þar sem þú finnur meiri náttúru, öruggara umhverfi og fjölbreyttari ævintýri en á nokkrum öðrum strandstað Taílands.
Velkomin í strandbæinn Ao Nang í hjarta Krabi þar sem alla þjónustu er að finna s.s. fjölbreytta veitingastaði, ótrúlegt úrval afþreyingar og margvísleg verslunartækifæri. Bær sem er umlukinn iðagrænni náttúru, við fegurstu sandstrendur Taílands og fallegustu sjávarsýn sem hægt er að ímynda sér.
Vekomin til Bangkok. Borg sem aldrei sefur, þar sem allt er í boði, allstaðar og ævintýrið gerist ekki stærra í mat og drykk, verslun og skemmtun.
Innifalið í verði:
Flug fram og til baka, flugvallagjöld og skattar, ferðataska og handfarangur, gisting, íslensk fararstjórn, gisting í tvíbýli með morgunmat á tilgreindum hótelum/gististöðum, allur akstur á milli flugvalla og gististaða einsog tilgreint er í ferðalýsingunni, og leiðsögn innlenda aðila þegar á við.
Ekki innifalið í verði:
Kostnaður við vegabréfsáritanir eða afgreiðslu á landamærum, eða þjórfé, persónuleg útgjöld og annað það sem ekki er nefnt hér að framan.
Ferðalýsing
Krabi er prúðasti og besti strandbær Taílands með sína mögnuðu og fjölbreyttu náttúru og óviðjafnanlega sjávar- eða fjallasýn. Snarbrattir hvítir kalksteinaklettar með græna hattskúfa úr framandi runnagróðri, pálmatrjám og puntstráum. Grænblátt hafið við hvítan skeljasandinn og út við sjónarröndina dansa óteljandi eyjur á túrkisgrænum sjónum. Svona er Krabi. Falleg, exótísk, unaðsleg og örugg.
Strandlengjan er löng og þar sem finnast flæðiskógar(mangrove) með sína ótrúlega skrítnu og óvenjulegu náttúru í dýrum og gróðri. Þér líður einsog Attenbourogh ef þú ákveður að róa kajak um þetta magnaða fenjasvæði með hoppand fiskum sem vita ekki alveg hvort þeir eru land- eða sjávardýr og skríkjandi apakettir hoppa um og hlæja og þar sem þú rennur áfram eftir stilltum haffletinum kemurðu kannski að perluræktarstöð eða rækjuakri. Þetta er mikið og magnað ævintýrasvæði tilvalið til útivistar og upplifunar á framandi náttúru Asíu.
Svo eru það fjöllin og margir hjóla- og gönguslóðar um dali og klettabelti. Já og talandi um klettana, er ekki kominn tími til að prufa klettaklifur? Það er aldeilis tækifæri til þess á Krabi.
Ao Nang strandbærinn er bæði ljúfur og spennandi þar sem verslanir, fljöbreyttir veitingastaðir og ýmsa afþreyingu er að finna. Taílenski maturinn er að sjálfsögðu í öndvegi en þarna eru líka flottir steikarstaðir, indverskir og ítalskir veitingastaðir auk ýmissa annara staða og gott úrval af börum og skemmtistöðum.
Krabi er staður til að njóta og upplifa, slaka á við sundlaugarbakkann, rölta um næturmarkaði og endalausa ströndina eða takast á við ævintýri og jafnvel átök í kajakaróðri, hjólreiðum, klettaklifri eða göngum. Þetta er staður fyrir heilbrigt líf og holl ævintýri.
Frá Krabi er hægt að sigla á nærliggjandi eyjur, t.d. til Phi Phi sem gerð var fræg af Leonardo di Caprio í myndinni The Beach eða að eyhólma sem nefndur hefur verið James Bond eyjan en heitir í raun Khao Phing Kan en var gerð fræg í Bondmyndinni The Man with the Golden Gun árið 1974.
Bangkok er hressileg og krassandi borg en hefur þó á sér margar mjúkar og menningarlegar hliðar og er langt frá því bara sú Bangkok sem þekkt er af endemum, s.s. einsog í kvikmyndinni Hangover 2.
Bangkok getur virkað kaótísk, torskilin og torfær. Bangkok er ekki að finna í grænum görðum, opnum torgum eða kólónískum búlívördum en sýnir sig þess betur í þröngum iðandi, angandi og æsandi öngstrætum eða framandi mörkuðum – hvort heldur votmarkaði að morgni eða sjóræningjamörkuðum að kvöldi. En friðarreitir finnast þó auðveldlega, t.d. fjölmörg falleg hof, sumhver forn og fræg, önnur ný og sérkennileg einsog reðurhofið við Nai Lert eða taóísk hof í kínahverfinu.
Stórborgir sýna oft sínar bestu hliðar og sterkustu einkenni í veitingastöðum og af þeim er nóg í Bangkok. Það eru ekki bara taílenskir og asískir veitingastaðir, heldur er aragrúi af frönskum, þýskum, sænskum, afríkönskum, amerískum og að sjálfsögðu ítölskum stöðum í borginni. Það er t.d. fullyrt að það séu fleiri ítalskir veitingastaðir í Bangkok en ítalir búsettir þar. Síðast þegar talið var fundust tæplega 500 ítalskir veitingastaðir þ.m.t. pizzeríur.
Bangkok byggðist upp á bökkum Chao Phraya fljótsins og við síkiskanala – bæði manngerða og náttúrulega. Lengi hafði verið byggð við bakkana en árið 1778, þegar Chakribræðurnir tóku völdin, var höfuðborg Síam(einsog landið nefndist þá) flutt frá Thonburi, vestan árbakkana að manngerðum hólma í fljótinu sem nefndur er Rattanakosin og dregur veldi núverandi konungsfjölskyldu(Chakriættin)nafn sitt af af hólmanum.
Borgin heitir reyndar alls ekki Bangkok, heldur kallast í daglegu máli Krung Thep, sem er stytting á lengsta staðarnafni í heimi – samvæmt heimsmetabók Guinnes. Fullt nafn er “Krung Thep Mahanakhon Amon Rattanakosin Mahinthara Ayuthaya Mahadilok Phop Noppharat Ratchathani Burirom Udomratchaniwet Mahasathan Amon Piman Awatan Sathit Sakkathattiya Witsanukam Prasit”, sem útleggst á íslensku sem;
“Hin stórkostlega borg engla, geymslustaður dýrmætra eðalsteina, hið mikilfenglega, göfuga og ósigranlega ríki, hið dýrlega heimili hinna níu konunglegu djásna, hinn konunglegi dvalarstaður og höll, hinn guðdómlegi verndarstaður og hið lifandi afdrep endurfæddra anda.”
Bangkok var aftur á móti þekkt sem viðurnefni borgarinnar fyrir uppbyggingu höfuðstaðarins og þýðir í raun þorp villtu ólífutrjánna.
GISTINGAR Í BOÐI
Centara Life Phu Pano Resort**** er lítið og þægilegt hótel þar sem ákveðinn ferskleiki einkennir allt bæði þjónustu og umhverfi. Hótelið er staðsett ofarlega í miðjum Ao Nang-bænum þaðan sem stutt er í alla þjónustu og afþreyingu.
Mix Bistro er veitingastaður hótelsins þar sem jafnt er boðið uppá vestrænan og asískan mat og sagt er að sjávarréttaplattinn þeirra sé eitt best geymda leyndarmál Krabi fyrir þá sem fá seint nóg af góðu fiskmeti auk þess sem taílensku kræsingarnar svíkja enga. Yfir daginn er ætíð kostur að panta mat uppá herbergi ef það hentar gestum betur t.d er hægt að njóta þeirra út á svölum.
Superior herbergin sýna sama létta og fallega yfirbragðið og allt hótelið og bjóða uppá útsýni yfir garðinn og upp til fjalla og mælast um 24 m2 að stærð með góðum svölum.
Sundlauginn og svæðið þar í kring er skemmtilegt og öll þjónusta til fyrirmyndar.
Centara Ao Nang Beach Resort **** er dásamlegt strandhótel og sannkallað “resort” með allri þjónustu svo gestir þurfa í raun ekkert að yfirgefa víða og fallega hótelgarðana og hafa nóg við að vera við sundlaugarnar.
Að sjálfsögðu er vönduð heilsulind á hótelinu enda er fullt nafn þessa dásemdarstaðar “Centara Ao Nang Beach Resort & Spa” og áherslan er mikil á “spa” partinn í nafninu og sjálfsagt hægt að finna eitthvað nýtt á hverjum degi á dekurlista heilsulindarinnar.
Veitingastaðirnir eru nokkrir fyrir nú utan það að hægt er að panta allar veitingar uppá herbergi ef gestir vilja fremur njóta þar.
Coco Pool Bar heitir sundlaugarbarinn sem reiðir fram létta snakkrétti og ýmsa drykki, Beach Bar nefnist að sjálfsögðu þjónustan sem er fyrir þá sem verja tímanum við ströndina þar sem framreiddur er bæði taílenskir og alþjóðlegir réttir og mikið úrval drykkja. Ef ítalskur matur höfðar til bragðlaukanna er Piazera pastastaðurinn með lausnina en ef gestir vilja gera extra vel við sig er Verandah loftkældur og ljúfur staður sem sörverar allskyns rétti frá hádegi og fram á kvöld. En þó má ekki gleyma að nefna Sand Beach Club þar sem einuningis er eldað úr sjávarfangi Krabi.
Gist er í Deluxe herbergjum sem eru rúmgóð eða um 40m2 með útsýni yfir sundlaugarsvæðið. Ókeypis internetaðgangur, baðsloppar og annar búnaður sem búast má við á lúxushóteli. Hægt er að panta herbergi með tengihurð á milli og gefinn er kostur á að bóka þrjá fullorðna í hvert herbergi eða par með tvö börn.
Athugið
Staðfestingargjald er 80.000 kr. og er óafturkræft. Vinsamlegast kannið forfallatryggingar sem fylgja kreditkortum og/eða heimilistryggingum.
Ferðaskrifstofan/fararstjóri áskilur sér rétt til að breyta áætlun ferðar ef veður, umferð eða aðrar ófyrirsjáanlegar aðstæður gefa tilefni til.
Mikilvægt er að nöfn á bókunum stemmi nákvæmlega við nöfn í vegabréfi. Það er á ábyrgð farþega ef svo er ekki.