Japan 2026

Við lendum í Tókýó, höfuðborg Japans, klukkan 14:25 að staðartíma. Innlendur leiðsögumaður tekur á móti hópnum við komuna og fylgir okkur í rútu á hótelið okkar í Tokyo. Eftir langt ferðalag er gott að hvíla sig eða rölta stutt í nágrenninu til að kynnast borginni. Um kvöldið snæðum við kvöldverð á völdum veitingastað. Gist í Tókýó.

Eftir morgunverð höldum við af stað í dagsferð um Tókýó. Fyrst förum við til Harajuku, líflegs og litskrúðugs hverfis sem er þekkt fyrir framsækna tísku, götumatarbása og ungmennamenningu. Þar má oft sjá ungt fólk klætt á eftir eigin stíl, óháð tískustraumum. Þaðan liggur leiðin í Meiji-helgidóminn, andlegt athvarf umvafið gróðursælum skógarlundi í hjarta borgarinnar. Helgidómurinn er tileinkaður keisara Meiji og keisaraynju hans. Við endum daginn í Shibuya, þar sem við göngum yfir hina frægu Shibuya Scramble Crossing gangbraut, tákn líflegs borgarlífs í Tókýó, þar sem hundruðir ganga samtímis yfir víðfeðma gangbrautina. Um kvöldið njótum við hefðbundins japansks kvöldverðar á völdum veitingastað. Gisti í Tókýó.

Eftir morgunverð leggjum við land undir fót og höldum í dagsferð til Hakone, sem er þekkt fyrir heita hveri, kyrrlátt landslag og stórkostlegt útsýni til Fuji-fjalls þegar veður leyfir. Við byrjum á heimsókn til Hakone-helgidómsins við Ashi-vatn. Þar gnæfa rauð Torii-hlið yfir vatnsbakkann og skapa friðsæla stemningu sem sameinar náttúru og trúarbrögð.
Næst förum við í gegnum Owakudani-dalinn, virkt jarðhitasvæði þar sem við finnum brennisteinslykt í loftinu og sjáum gufustróka stíga upp úr jörðinni. Þar fáum við tækifæri til að smakka svokölluð svört egg, sem eru soðin í hverunum og sögð lengja lífið. Í lok dags tökum við kláfferju yfir fjalllendi Hakone og síðan bátsferð á Ashi-vatni, þar sem útsýni til Fuji-fjalls glitrar við sjóndeildarhringinn ef himinninn er tær. Snúum aftur til Tókýó seinnipart dags.
Um kvöldið snæðum við kvöldverð á völdum veitingastað. Gist í Tókýó.

Eftir morgunverð heldur ævintýrið áfram. Við heimsækjum Shibuya Scramble Square, nýlega opnaða byggingu með útsýnispalli sem veitir okkur stórkostlegt 360° útsýni yfir borgina. Þaðan förum við til Senso-ji, elsta búddistahofs Tókýó, staðsett í Asakusa-hverfinu. Við göngum eftir Nakamise-verslunargötunni, þar sem hægt er að kaupa handverk, sætan japanskan götumat og minjagripi í gamla stílnum. Við ljúkum deginum með göngu um glæsilega Ginza, eitt dýrasta og glæsilegasta lúxus borgarhverfi heims, þar sem er að finna fjölmargar heimsþekktar tískuverslanir, veitingastaði og kaffihús. Við snæðum kvöldverð á japanska veitingastaðnum Izakaya, þar sem boðið er upp á bæði japanska og vestræna rétti. Gist í Tókýó.

Í dag yfirgefum við stórborgina og ökum í gegnum skógi vaxið landslag til sögufræga staðarins Nikko, sem sameinar óspillta náttúru og andlega arfleifð. Við byrjum á heimsókn í Rinnoji-hofið, rólegt og virðulegt búddistahof umvafið skógum og stillu. Þar finnum við frið sem hefur endst í aldir. Þaðan förum við til Toshogu-helgidómsins, þar sem við sjáum stórfenglega smíði og gullútskorið skraut, helgað hinum valdamikla Tokugawa Ieyasu, fyrsta sjógún Tokugawa-ættarinnar. Seinnipartinn höldum við til fjallabæjarins Nagano, sem er þekktur fyrir vetraríþróttir, fjallasýn og trúarlega arfleifð og þar snæðum við kvöldverð og gistum í Nagano.

Eftir morgunverð ökum við inn í hjarta fjallanna og heimsækjum dularfulla og forvitnilega náttúru við Jigokudani, þar sem við sjáum japanska snjóapa baða sig í heitum náttúrulaugum, mitt í vetrarlandslagi sem minnir á japönsk málverk. Frá vetrardýrunum höldum við áfram til Shirakawa-go, sögulegs þorps á heimsminjaskrá UNESCO sem er þekkt fyrir sérstök stráþök. Að lokinni heimsókn í þetta kyrrláta og einstaka þorp höldum við til Takayama, borgar sem varðveitir andrúmsloft gamla Japans. Þar innritum við okkur á hótel sem býður upp á Onsen, hefðbundið japanskt heitt bað – fullkomið til að slaka á eftir daginn. Við njótum kvöldverðar á hótelinu eða í bænun. Gist í Takayama.

Dagurinn hefst með heimsókn á morgunmarkaðinn í Takayama, þar sem við röltum á meðal bása með grænmeti, handverk og heimagerðar kræsingar. Við höldum áfram að kanna gömlu miðborgina í Takayama og Sanmachi-svæðið, hjarta gamla bæjarins, þar sem göngugötur, byggingar frá Edo tímabilinu og sake-bruggverksmiðjur bjóða upp á ferð aftur í tímann. Seinnipartinn ökum við suður yfir landið til borgarinnar Himeji, þar sem glæsilegur kastali gnæfir yfir borginni. Kvöldverður: Á staðbundnum veitingastað þar sem við smökkum rétt úr þessu svæði. Kvöldverður í bænum og gist í Himeji.

Eftir morgunverð heimsækjum við hinn tilkomumikla Himeji-kastala, oft kallaður “Hvíti hegrakastalinn” vegna glæsilegrar og fallegrar hönnunar. Kastalinn er einn þeirra fáu sem stóð af sér eld, jarðskjálfta og stríð og er í dag á heimsminjaskrá UNESCO. Við tökum síðan Shinkansen-hraðlest til Hiroshima, borg sem stendur uppi sem tákn um frið og uppbyggingu eftir harmleik síðari heimsstyrjaldar. Um kvöldið smökkum við hefðbundinn rétt sem á uppruna sinn í Hiroshima, Okonomiyaki dinner, ljúffenga japanska pönnuköku fyllt með alls konar góðgæti og elduð beint á heitri járnplötu fyrir framan okkur.

Eftir morgunverð tökum við ferju yfir til dásamlegu eyjunnar Miyajima, þar sem við skoðum Itsukushima-musterið með fljótandi Torii-hliðinu og er á heimsminjaskrá Unesco. Eftir heimsóknina á Miyajima snúum við aftur til Hiroshima og heimsækjum Friðarminjasvæðið, þar sem Friðargarðurinn, Friðarsafnið og Atómhvelfingin minna okkur á söguleg örlög borgarinnar, en um leið tákn um seiglu Hiroshima. Kvöldverður og gisting í Hiroshima.

Við yfirgefum Hiroshima og höldum til Kyoto, fyrrum höfuðborgar Japans í margar aldir. Í borginni er fullt af fallegum görðum og hofum. Mörg hofanna eru á heimsminjaskjrá Unesco. Við heimsækjum eitt þeirra sem kallað er gyllta hofið, Kinkaku-ji, Þetta einstaka hof, sem stendur við lítið vatn, er þakið ekta gullþynnum og umkringt fallegum görðum sem bjóða upp á kyrrð og fegurð og er helgað Zen búddistum.
Í kvöldverð fáum við að smakka Shabu-Shabu, japanskan rétt þar sem þunnar sneiðar af kjöti og grænmeti er eldað við borðið í heitum potti, ljúffeng og skemmtileg máltíð. Gist í Kyoto.

Eftir morgunverð heldur ferðin áfram með dásamlegri göngu um Arashiyama bambusskóginn, þar sem hár bambus sveiflast mjúklega í vindi og skapar töfrandi upplifun. Við höldum svo til Kiyomizu-dera, hins stórbrotna búddistahofs sem stendur á háum súlum með útsýni yfir gamla hluta Kyoto. Hér getur maður ímyndað sér líf Japana fyrir öldum síðan. Þá heimsækjum við iðandi Nishiki-markaðinn, kallaðan “eldhús Kyoto”, staður þar sem litir, lykt og smakk blandast í eina samfellda matarupplifun. Að lokum tökum við þátt í teathöfn, þar sem okkur er kennt að brugga matcha-te og fylgja fornum siðum með virðingu og kyrrð.
Kvöldverður og gisting í Kyoto.

Eftir morgunverð byrjum við að heimsækja Fushimi Inari musterið, sem er þekkt fyrir mörg þúsund rauðra Torii-hliða sem mynda göngustíg upp á fjallið Inari. Næst heimsækjum við Nara, þar sem við sjáum Todaiji-hofið, eitt stærsta hof heims og heimili risavaxins brons Búddalíkneskis og Nara garðinn. Í Nara-garðinum eigum við skemmtilega stund með vinalegum dádýrum sem ganga frjáls og hneigja sig fyrir gestum. Síðdegis ökum við til Osaka, þar sem við könnum líflega Dotonbori hverfið, sem er þekkt fyrir skrautlega götur með neonskiltum, götumat og afþreyingu. Kvöldverður og gisting í Osaka.

Dagurinn hefst á ferð upp í Umeda Sky-bygginguna, þar sem við njótum stórfenglegs útsýnis yfir þéttbýli Osaka frá opnum útsýnispalli. Eftir það verður frjáls tími í Shinsaibashi eða Namba, tveimur af mest spennandi verslunarhverfum borgarinnar, þar sem allt frá tísku til tækni er innan seilingar. Hádegisverður og gisting í Osaka. Kvöldverður á eigin vegum.

Eftir morgunverð höldum við aftur til höfuðborgarinnar með hraðlestinni Shinkansen til Tókýó. Við komuna til Tókýó fáum við síðdegið og kvöldið til að slaka á. Gisting: Tókýó

Í dag heimsækjum við sögufræga strandbæinn Kamakura, fyrrum stjórnsýslumiðstöð samúraanna.Við byrjum hjá stóra Búddalíkneskinu, sem situr undir berum himni og hefur staðið af sér jarðskjálfta og fellibylji í meira en 700 ár. Við höldum áfram til Tsurugaoka Hachimangu, helgidóms sem var miðpunktur valds samúraanna á tímum Kamakura-stjórnarinnar. Í Komachi stræti gefst tími til að smakka götumat, kaupa handverk og skoða litlar verslanir. Hádegisverður á veitingastað í Kamakura.
Gist í Tókýó, kvöldverður á eigin vegum.

Síðasti dagur ferðarinnar rennur upp. Eftir morgunverð er frjáls tími fram að hádegi, þá fáum við hádegisverð á veitingastað í borginni áður en við höldum til Akihabara, miðstöð rafeindatækni og anime-menningar, þar sem hægt er að gera síðustu innkaupin eða njóta stemningarinnar.
Um kvöldið höldum við út á Narita-flugvöll þar sem við kveðjum Japan eftir ógleymanlega ferð.