Grand Indónesía

SINGAPÚR

Sumir kalla Singapúr draumaland kapítalismans. Skrifstofuturnar – fullkomlega hannaðir eftir reglum feng shui – teygja sig upp til himins, verslunarmiðstöðvar eru við hvert fótmál og menningarstofnanir prýða strandlengju þessa örsmáa borgríkis í túnfæti Malasíu og Indónesíu.

Kannski er Singapúr gluggi inn í framtíð Asíu. Þótt ekki sé allt fullkomið á bak við glerturnana og marmarann líta margir til Singapúr sem fordæmis fyrir álfuna alla til að læra af og apa eftir. Í dag eru þarlendar tekjur á hvert mannsbarn með því hæsta sem gerist í heiminum og áður en þessi öld er hálfnuð er því spáð að ríkjustu þjóðir Skandinavíu verði varla hálfdrættingar á við Singapúr í tekjum og lífsgæðum.

En hvernig á að lýsa Singapúr? New York Austursins? Blanda af því besta úr austri og vestri þar sem menningarstraumar frá Kína, Indlandi, Malasíu og Eyjaálfu renna saman í einn fullkominn graut? Matgæðingar segjast t.d. hvergi fá betri kínverskan eða indverskan mat en í Singapúr. Metnaðurinn, eljusemin og samkeppnin hefur smitað frá sér úr viðskiptalífinu og inn í eldhúsin þar sem búið er að fínstilla öll kryddin og sósurnar fyrir þá fjölþjóðlegu bragðlauka sem búa í borginni.

Annars eiga þeir sem ferðast um Asíu varla að geta komist hjá því að heimsækja Singapúr. Flugvöllur borgarinnar er nefnilega ein stærsta samgöngumiðstöð álfunnar og ógrynni flugfélaga notar Changi-flugvöllinn til að tengja saman austrið og vestrið. Ferðalangar þurfa ansi góða afsökun til að staldra ekki við – ef ekki væri nema í nokkra daga – til að upplifa lystisemdir borgarinnar.

Ferðamenn þurfa bara að gæta þess að ekki leynist tyggjópakki í töskunni þegar komið er til landsins. Til að halda borginni fallegri og hreinni var tyggjó bannað með lögum árið 1992 og ekki nóg með það heldur geta þeir sem henda rusli á götuna átt von á þúsund dollara sekt.

Indónesía er fjórða fjölmennasta ríki heims. Þetta víðfeðma og margbrotna land er engu líkt, samansafn smárra og stórra eyja sem teygja sig frá Ástralíu upp til syðsta enda Malasíu. Einn risavaxinn hrærigrautur af fólki, menningu og náttúru, þar sem rösklega 300 ólíkir þjóðflokkar hafa eigin dansa, matseld og listform.

Java

Java býr yfir glæsilegri sögu. Í bæjunum Sóló og Jógjakarta eru hallir múslímskra soldána skoðaða og antíkmarkaðir þræddir.  Prambana hofin frá tíma Hindúa og Bóróbúdúr sem er stærsta hof sem reist hefur verið Búddha til dýrðar og stendur nú í miðju stærsta ríki múslíma í heimi. Farþegar njóta sólarupprásar við eldgíg Brómó sem er eitthvert myndrænasta og fallegasta eldfjall í heimi. 

Tæplega 60% íbúa Indónesíu búa á Jövu og er hún talin þéttbýlasta eyja í heiminum. 

Alls eru 300 þjóðarbrot viðurkennd í Indónesíu og hvorki fleiri né færri en 742 tungumál hafa verið skráð þar.

Javamaðurinn er þekktur forsögulegur maður sem fannst á Jövu í lok nítjándu aldar og hefur þótt sanna að „homo erectus“ hefur verið á eyjunni fyrir 1.5 milljón ára, eða í síðasta lagi fyrir 35.000 árum.

Arfleifð Hollendinga sem lengi ríktu yfir þessari fyrrum nýlendu sinni er víða sjáanleg en markar þó ekki dýpri spor í sögu eyjunnar en hin fjölmörgu konungsdæmi heimamanna sem ríktu yfir þessari frjósömu og þéttbýlu eyju sem hefur fóstrað sterk menningarsamfélög hindúa, búddista og múslíma í gegnum tíðina. 

Á Jövu, sem kalla má höfuðeyja Indónesíu, verður dvalið í vikutíma í bæjunum Jogjakarta, Sóló og Súrabæjaborg og farið um Bóróbódúr, Prambanan, Brómófjall og fleiri merka staði.

Kraumandi eldfjöll, ævaforn hof, bæjir með höllum soldána, frumstæð þorp og iðagræn og heillandi náttúra er meðal þess sem ber fyrir augu á Jövu.

Kómódó og Flóres

Frá Súrabæja er flogið suður yfir eyjurnar Balí, Lombok, Súmbava og að lokum lent á Flóreseyju þar sem dvalið verður í tvær nætur, eina nótt um borð í phinis-bát þegar farið verður að Kómódóeyju og aðra nótt á Flóreseyju sjálfri. Á Kómódó og Rinjaeyju finnast enn risaeðlur, en kómódó-drekarnir eru stærstu eðlur í heimi. Fyrir utan dýralífið ríkir ólík menning á Floreseyjum en ferðalangar hafa kynnst á Jövu eða munu kynnast síðar á Balí.

Neðansjávar við Kómódó eru einhver ævintýralegustu köfunarsvæði í heimi.

Kómódódrekarnir eru magnaðar skepnur sem verða allt að 3ja metra langar og eru engin gæludýr. Það var ekki fyrr en 1910 sem hinum vestræna heimi varð kunnugt um þessar kynjaskepnur og enn koma vísindamenn sér ekki saman um uppruna, ástæður fyrir þessum risavexti eða hvort bit þeirra séu eitruð. Drekarnir veiða sér til matar hin ýmsu dýr og allmörg dæmi er um að drekarnir valdi fólki skaða.

Annað lífríki, menning og mannlíf Kómódó og Rinca eyjanna er forvitnilegt fyrir margar sakir og munu leiðangursmennn kynnast hinum ýmsu hliðum þessa afskekkta horns heimsins.

Flogið verður frá Jövu til Kómódó þar sem dvalið verður 3 daga og eyjun skoðuð og reynt að komast í návígi við Kómódódrekana.

Balí

Það kemur mörgum á óvart hversu ósnortin og afskekkt Balí er í raun. Hvergi viðhaldast hefðir og rótgróið trúarlíf á eins látlausan hátt og þar. Þrátt fyrir að Balíbúar hafi tekið stór og djörf skref inn í “nútímann” á fáum áratugum virðast þeir ekki hafa þurft að fórna hinum sterku og einstöku hefðum sínum. 

Á Balí má kynnast dularfullri og heillandi menningu eyjarskeggja, sjá dans barongskrímslanna, hlusta á bambus-sílófóna, láta dáleiðast af þokkafullum fingrum og stjörfum augum legong-dansaranna, falla í djúpan trans með kecakdanshópi eða færa hindúaguðinum Visnú fórnir.

Náttúrufegurð Balí er stórkostleg; þar skiptast á tignarleg fjöll og grösugir dalir, beljandi ár og sindrandi lækir, eldstöðvar og tær fjallavötn, hvítar strendur og háir sjávarhamrar. 

Leiðangurinn endar á rólegum nótum á hinni ljúf og kyngimögnuðu eyju Balí.  Dvalið verður fyrst dvalið í fjallabænum Úbúd þaðan sem stutt er að sækja merkustu staði eyjunnar auk þess að slaka vel á og hvílast á þeim stað sem gjarnan er nefndur paradís og síðustu dögum verður svo varið á suðurodda Balí, í strandbænum Sanúr. Á leiðinni frá Úbúd til Sanúr verður farið um vesturenda eyjunnar og komið við í Karegasem og Klungung konungsdæmunum þar sem gamla Kerta Gosa dómhúsið verður skoðað, farið í þorp frumbyggja Balí sem nefnist agafólkið auk þess að koma við í Goa Lawah hellunum þar sem hof hindúa er deilt með þúsundum leðurblakna.

Hægt er að beina fyrirspurnum beint til Viktors á netfangið viktor@uu.is eða hringja í síma 8975868.

HÓTEL