Fegurð Króatíu

Beint flug með Play til Split í Króatíu. Lending kl.16:30 á flugvellinum í Split, rúta flytur hópinn til hins fallega bæjar Vodice þar sem gist verður í 7 nætur. Aksturinn til Vodice tekur ca. 1.5 klst. Kvöldverður innifalinn á hóteli.

Að morgunverði loknum, kl.09:00, verður farið í skemmtilega skoðunarferð með staðarleiðsögumanni til Sibenik. Þessi fallega borg á mikla og merkilega sögu allt frá miðöldum og er afar skemmtileg heim að sækja. Frjáls tímí eftir gönguferð og upplagt að fá sér hádegisverð á einum að frábærum veitingastöðum borgarinnar (hádegisverður ekki innifalinn). Við yfirgefum Sibenik um kl 13:30 og höldum rakleiðis í vínsmökkun á Baraka vínekrunni. Hér gefst kostur á að smakka hvítt, rautt og rósavín og fræðast um vínrækt í héraðinu. Lagt af stað til baka kl.15:30. Frjáls seinni partur og kvöldverður á hótelinu.

Lagt er af stað kl.10:00 og keyrt í Etnoland, sem er endurgerð af húsakynnum Dalmatíubúa og við fáum við að fræðast um hvernig fólk bjó og lifði í Dalmatíu héraði áður fyrr. Hér fáum að smakka hina frægu Drniš “pršut” sem er hráskinka þeirra Króatíubúa ekki ósvipuð ítalskri Prosciutto skinku eða Jamón Ibérico frá Spáni. Einnig verður boðið upp á vín úr héraðinu ásamt brauði. Skemmtileg skoðunarferð um híbýlin með sögumanni. Hádegisverðurinn hér er hefðbundinn Dalmatíu matur upp á það allra besta hádegisverður innifalinn). Eftir hádegisverð verður farið í þjóðgarðinn Krka þar sem fegurðin er einstök. Gengið verður ásamt staðarleiðsögumanni að Krka fossunum en þeir eru frægir fyrir einstaka fegurð. Eftir gönguna í Krka tekur við stutt bátsferð (20 min) niður eftir ánni að bænum Skradin. Hér förum við aftur í rútuna og ökum sem leið liggur á hótelið okkar í Vodice. Frjáls seinni partur og kvöldverður á hótelinu.

Að morgunverði loknum verður haldið til bæjarins Trogir. Þar verður farið í skemmtilega skoðunarferð um bæinn og einnig gefst frjáls tími til að rölta um og snæða hádegisverð (hádegisverður ekki innifalinn). Kl.13 er keyrt til Split og farið í skoðunarferð þar, en Split er dásamleg strandborg og vinsæll ferðamannastaður í Króatíu. Frjáls tími gefst til þess að skoða borgina á eigin vegum og versla eða setjast niður á kaffihús og njóta mannlífsins.
Kl.17:30 verður snúið aftur til Vodice. Kvöldverður innifalinn á hótelinu og frjálst kvöld.

Kl.09:40 röltir hópurinn saman niður að bryggju í Vodice þar sem farið verður um borð í bát og farið í skemmtilega siglingu og eyjahopp. Ef veður leyfir verður hægt að synda í sjónum og er því mælt með að taka sundföt með eða vera í þeim undir fötunum. Hádegisverður innifalinn um borð. Komið verður tilbaka um kl.15:30, kvöldverður innifalinn á hóteli og frjálst kvöld.

Frjáls dagur fyrir þá sem vilja.
Hægt er að kaupa afar skemmtilega og áhugaverða skoðunarferð til hinnar fornu borgar Zadar sem á sögu 3000 ár aftur í tímann. Elstu leifar mannlegrar tilveru og menningar í Zadar-héraðinu ná allt aftur til steinaldar. Elsti Dalmatíumaðurinn fann á þessu svæði í jarðlögum sem eru yfir 15.000 ára gömul.
Einnig verður saltverksmiðjan Nin heimsótt. Solanin.hr/en/ Ferðin er keypt sérstaklega í kaupferlinu en einnig er hægt að bæta henni við eftirá. Síðasti dagur til að bóka ferðina er 25.mars.

Morgunverður og frjáls dagur. Rúta flytur hópinn á flugvöllinn kl. 14:00 en fram að því er frjáls tími. Hægt verður að geyma farangur á hótelinu eftir að búið er að skrá alla út og njóta dagsins fram að brottför.
Brottför frá Split flugvelli kl.17:30, lending í Keflavík kl. 20:30 að staðartíma.