Túnis 2026

Við komuna verður tekið á móti okkur og ekið á hótel þar sem við hvílum okkur eftir ferðalagið. Gist yfir nótt í Túnis og kvöldverður á hóteli. 

Eftir morgunverð höldum við í skoðunarferð til Þjóðminjasafnsins Bardo, sem er til húsa í höll frá nítjándu öld og geymir eitt stærsta og merkasta mósaíksafn heims. Því næst ökum við til fornminjasvæðisins í Karþagó, sem er á heimsminjaskrá Sameinuðu þjóðanna. Þar skoðum við meðal annars rústir af fornum baðhúsum og hringleikahúsi. Við snæðum hádegisverð á staðbundnum veitingastað áður en við heimsækjum hinn töfrandi bæ Sidi Bou Said. Þar tökum við inn stemninguna í hvítu og bláu húsunum, njótum blómskrúðsins og útsýnisins yfir Miðjarðarhafið. Við fáum smá  frjálsan tíma til að skoða okkur um, versla eða setjast niður með hefðbundið piparmyntute. Við endum daginn á Café des Délices þar sem við njótum útsýnisins áður en við snúum aftur á hótelið. Kvöldverður og gisting í Túnis.

Eftir morgunverð ökum við til bæjarins Testour, sem er fallegur andalúsískur bær með sögulegum byggingum og sérstökum klukkuturni þar sem úrskífan snýst öfugt. Þar skoðum við miðbæinn og moskuna áður en haldið er áfram til Dougga. Dougga er ein best varðveitta rómverska borgin í Afríku og einnig á heimsminjaskrá. Við göngum um rústirnar, dáumst að leikhúsinu og líflegu steinaristunum sem lýsa lífi og menningu á tíma Rómverja. Við snæðum hádegisverð í nágrenninu áður en við ökum áfram til Kairouan, sem er ein helgasta borg Íslamstrúar og mikilvæg trúarleg miðstöð. Kvöldverður og gisting í Kairouan.

Dagurinn hefst með morgunverði og í kjölfarið förum við í skoðunarferð um Kairouan. Við heimsækjum hina áhrifamiklu Stóru mosku borgarinnar, sem telst ein sú elsta og mikilvægasta í íslamskri byggingarlist. Við stoppum einnig við Barber moskuna, sem tileinkuð er einum fylgjanda Múhameð og lítum inn í Aghlabid-vatnsgeyminn, verkfræðilegt undur frá miðöldum. Eftir það göngum við um gömlu medínuna og heimsækjum handverkshús þar sem við fáum að smakka hefðbundið bakkelsi. Eftir hádegisverð ökum við suður í átt til Tozeur þar sem gist verður næstu nótt. Á leiðinni njótum við breytilegs landslags og stöðvum eftir þörfum til að taka myndir eða rétta úr okkur.   Ef aðstæður leyfa fáum við að upplifa töfra Tozeur með túniskri kvöldskemmtun í náttúrulegu umhverfi, umlukt gróðri og hefðbundnum innréttingum sem skapa einstaka stemningu.  Að öðrum kosti getum við notið kvöldverðar á dvalarstaðnum okkar, en að honum loknum er boðið upp á hljóð- og ljósasýningu sem endurskapar frægustu sögur Austurlanda. Sýningin fer fram í glæsilegri eftirlíkingu af gamalli höll, þar sem finna má safn leirkerja, skartgripa, búninga og annarra fornra muna ásamt listagalleríi.   Gisting og kvöldverður í Tozeur. 

Við byrjum daginn með morgunverði áður en við leggjum af stað í ævintýraferð á fjórhjóladrifnum jeppum í átt að vinjunum Tamerza og Chebika. Við njótum landslagsins þar sem fjöllin, gróðurinn og fossarnir bjóða upp á stórbrotið útsýni. Í Chebika förum við í stutta gönguferð með leiðsögn þar sem við kynnumst sögu svæðisins og náttúrufegurðinni. Þaðan höldum við áfram til Mos Espa, þekkts kvikmyndatökusvæðis úr Star Wars, þar sem við sjáum upprunalegar sviðsmyndir og náttúruundrið Ong Jemal, klettamyndun sem minnir á úlfalda. Við snæðum hádegisverð á Eden Palm, þar sem við fáum einnig að smakka vörur úr pálmatrjám og njóta stuttrar vagnferðar um svæðið. Eftir hádegi ökum við yfir hina víðfeðmu saltheiði Chott El Jerid á leið okkar til eyðimerkurinnar. Þar bíður okkar einstök upplifun þar sem við gistum í lúxusbúðum í eyðimörkinni í Ksar Ghilane. Kvöldverður verður borinn fram og við eigum notalega stund undir stjörnubjörtum himni í eyðurmörkinni. Gisting í Sahara.

Við hefjum daginn snemma með morgunverði. Fyrir áhugasama býðst valkostur að njóta sólarupprásar á baki úlfalda eða í fjórhjólaför um eyðimörkina. Greiða þarf aukalega á staðnum. Við kveðjum eyðimerkurbúðirnar og ökum í átt að Tamezret, berbaþorpi sem stendur hátt í fjöllunum og er þekkt fyrir sérkennilega hleðslu og menningararf. Því næst förum við til Matmata, þar sem við heimsækjum jarðhýsi, hefðbundin híbýli innfæddra sem grafin eru ofan í jörðina til að veita skjól fyrir hita dagsins. Þar snæðum við hádegisverð með heimamönnum og upplifum daglegt líf á svæðinu. Í lok dags heimsækjum við hótelið Sidi Driss, enn einn Star Wars tökustaðurinn, sem hefur varðveitt upprunalegt útlit sviðsmynda úr fyrstu myndunum. Gist í Matmata, kvöldverður á hóteli. 

Eftir morgunverð leggjum við af stað í gegnum hrjúft og töfrandi landslag í átt að Toujane, litlu berbaþorpi sem er innrammað af fjöllum. Þorpið er þekkt fyrir ullarvörur og litríkan heimilisiðnað, og hér gefst tækifæri til að staldra við, njóta útsýnis og líta á handverk heimamanna. Við höldum áfram til Ksar Hadada, sem margir kannast við úr kvikmyndunum um Star Wars. Þar skoðum við gömlu korngeymslurnar, sem áður þjónuðu sem vopnabúr, vistarverur og markaðsstöðvar fyrir berbaþjóðflokka – og mynda í dag óvenjulegt og heillandi rými sem hefur verið notað sem sviðsmynd í kvikmyndagerð. Því næst ökum við til Chenini, þorps sem stendur uppi á fjallshlíð og er eitt af merkustu berbaþorpum suðurhluta Túnis. Dáumst að Ksar virkinu sem stendur í um 500 metra hæð yfir sjávarmáli og var notað til geymslu matvæla og verðmætra vara, þjónaði einnig sem hæli ef árás yrði gerð á þorpið. Við snæðum hádegisverð í rólegu og hefðbundnu umhverfi áður en við heimsækjum  Ksar Ouled Soltane, sögulegt hæðarbýli þar sem finna má tvo garða með glæsilegum korngeymslum sem hafa varðveist frá fornöld. Síðan endum við í bænum  Douiret, annars forns fjallaþorps þar sem gistum yfir nótt í sérstöku nútíma hellahóteli. Kvöldverður á hóteli. 

Við byrjum daginn með morgunverði og ökum þaðan til eyjunnar Djerba, sem liggur við suðausturströnd Túnis og er þekkt fyrir afslappað andrúmsloft og gyðinglega arfleifð. Við heimsækjum El Ghriba samkunduhúsið, sem er eitt elsta sinnar tegundar í Afríku og mikilvægur staður fyrir gyðinga í Norður-Afríku. Við snæðum hádegisverð og höldum að því loknu áfram í Djerbahood, listrænt hverfi í miðri Medínu Houmt Souk, þar sem tugir alþjóðlegra listamanna hafa skreytt húsveggi með fjölbreyttum vegglistaverkum. Síðla dags innritum við okkur á hótelið í Djerba, snæðum kvöldverð á hóteli og njótum kyrrðarinnar við Miðjarðarhafið. 

Eftir morgunverð ökum við til Guellala, sem er þekkt fyrir leirkeragerð og handverk. Þar fáum við að fylgjast með keramikgerð og skoða verkstæði heimamanna. Við höldum svo áfram til Houmt Souk, aðalborgar Djerba, þar sem við röltum um markaðina, veltum fyrir okkur kryddum, teppum og handverki og njótum ilmsins og litadýrðarinnar sem einkennir svæðið. Við snæðum hádegisverð á staðbundnum veitingastað og förum svo tilbaka á hotel. Gisting og kvöldverður í Djerba.

Frjáls dagur. 

Gisting og kvöldverður í Djerba.

Eftir morgunverð yfirgefum við Djerba og ökum norður í átt að El Jem, þar sem við skoðum eitt glæsilegasta hringleikahús fornaldar utan Ítalíu. Hringleikahúsið, sem er á heimsminjaskrá, minnir á Colosseum og sýnir glæsilega rómverska byggingarlist. Við snæðum hádegisverð og höldum síðan áfram til strandborgarinnar Monastir. Þar heimsækjum við Ribat-virkið sem gnæfir yfir sjóinn og hefur gegnt mikilvægu hlutverki í sögu borgarinnar. Seinnipart dags er ekið til Sousse þar sem gist verður yfir nótt, kvöldverður á hóteli.

Við hefjum daginn með morgunverði áður en við leggjum af stað í skoðunarferð um hina sögufrægu strandborg Sousse, sem hefur verið miðstöð verslunar og menningar í aldaraðir. Við byrjum á að heimsækja Kasbah-virkið, sem gnæfir yfir borgina og hýsir eitt merkasta fornleifasafn Túnis. Þar förum við í ferðalag aftur í tímann, í gegnum stórbrotið mósaíksafn frá rómverskum tíma, forn gripasöfn, styttur og listmuni sem varpa ljósi á daglegt líf og trúarbrögð til forna. Útsýnið af virkinu er engu líkt, þar sjáum við bæði yfir Medínuna og út á haf. Eftir safnsheimsóknina göngum við niður í sjálfa Medínu Sousse, sem er á heimsminjaskrá UNESCO. Þar röltum við um þröngar og krókóttar götur, fram hjá litlum verslunum, torgum og iðandi markaðslífi þar sem ilmur af kryddum, jurtum og bakstri svífur um göturnar. Við snæðum hádegisverð í hjarta gamla bæjarins og höldum síðan áfram í heimsókn í Ribat-virkið, sem var reist á áttundu öld. Þetta virki gegndi bæði hernaðarlegu og trúarlegu hlutverki og stendur enn í dag sem minnisvarði um snjalla byggingartækni og helga þjónustu. Seinnipart dagsins gefst frjáls tími til að njóta Medínunnar frekar, versla minjagripi eða slaka á yfir tei á kaffihúsi. Kvöldverður og gisting í Sousse.

Eftir morgunverð kveðjum við Sousse og ökum til vinsæla strandbæjarins Hammamet, sem er þekktur fyrir sitt afslappaða andrúmsloft, glæsilegar sandstrendur og menningarlega arfleifð. Við byrjum á að skoða Medínuna, þar sem við röltum um þröngar götur innan virkisveggjanna og njótum hefðbundinnar byggingarlistar. Við komum við í El Kasbah, virkinu sem gnæfir yfir sjóinn, og lítum yfir gömlu höfnina. Eftir hádegisverð heimsækjum við nútímalega hverfið Yasmine Hammamet þar sem finna má verslanir, kaffihús og lystigarða. Þar gefst tími til að skoða sig um eða hvíla sig við sjávarsíðuna. Gisting í Hammamet og kvöldverður á hóteli.

Frjáls dagur.

Gisting í Hammamet og kvöldverður á hóteli. 

Eftir morgunverð leggjum við af stað í ferðalag um Cape Bon-skagann. Fyrst stoppum við í Nabeul, bæ sem er þekktur fyrir leirkeragerð og handverk. Þar gefst tækifæri til að skoða markaði og kaupa fallega minjagripi. Við höldum síðan áfram til fornminjasvæðisins Kerkouane sem er á heimsminjaskrá. Þetta er ein örfárra fönískra borga sem hefur varðveist vel og ekki verið byggð yfir. Þar fáum við innsýn í daglegt líf og byggingarlist Forn-Grikkja og Föníkíumanna. Hádegisverður er snæddur á veitingastaðnum La Daurade við sjávarsíðuna, þar sem við njótum fersks sjávarfangs í rólegu umhverfi. Að því loknu höldum við til Tunis, þar sem við skoðum gömlu borgarhverfin í miðborginni, þar á meðal Medina Tunis og Bab el Bhar, hliðina sem skilur að nýja og gamla hluta borgarinnar.  Gist í Tunis yfir nótt og kvöldverður á hóteli.

Eftir morgunverð verður okkur ekið út á flugvöll fyrir heimför.