Páskasigling frá Feneyjum 2025

Flogið til Feneyja með Lufthansa kl.14:00 frá Keflavík. Millilent í Frankfurt, lending þar kl.19:30. Flogið aftur af stað frá Frankfurt kl. 21:00 og lent á Feneyjarflugvelli kl.22:20 að staðartíma.
Frá flugvellinum tökum við vatnaleigubát (e.Water Taxi) yfir að Markúsartorgi og komum okkur fyrir á Hotel Cavalletto e Doge sem er yndislegt 4 stjörnu hótel staðsett um 100 metrum frá Markúsartorginu. Herbergin eru innréttuð í feneyskum stíl og er fallegt útsýni yfir síkin allt um kring. Frjálst kvöld

Að morgunverði loknum verður farið í skemmtilega 2ja tíma skoðunarferð (gönguferð) um Feneyjar. Frjáls dagur það sem eftir er dags og tilvalið að rölta um og njóta alls hins fagra sem Feneyjar hafa upp á að bjóða. Borgin er oft nefnd drottning Adríahafsins og er einstök upplifun að sigla um kanala á gondólum og virða fyrir sér stórhýsi og glæsihallir liðinna tíma. Feneyjar eru reistar á mörgum hólmum og er helsti ferðamáti íbúa þar, enn sem fyrr, að sigla. Hér er yndislegt að vera og af nógu að taka.

Að morgunverði loknum getur fólk tekið því rólega þar til komið er að því að skrá sig út af hótelinu. Vatnaleigubátur flytur hópinn að Port Marghera þaðan sem skemmtiferðaskipið siglir, en mælt er með því að vera kominn þremur tímum fyrir brottför. Skipið siglir af stað kl.17:00.

Komið er til Zadar kl.08:00 að morgni páskadags. Zadar er fögur borg í Króatíu þar sem finna má vel varðveittar rústir frá tímum Rómaveldis, fallegar byggingar, krúttleg kaffihús og glæsisnekkjur, allt í bland! Zadar var eitt sinn höfuðborg Dalmatíuhéraðsins og fram til ársins 1945 tilheyrði hún Ítalíu. Í kjölfar seinni heimsstyrjaldarinnar og fram til 1991 voru íbúar hér íbúar Júgóslavíu en nú tilheyrir borgin Króatíu. Sjá má áhrif og ummerki allra þessara ólíku tímabila þegar gengið er um bæinn, svo sem Roman Forum, Narodni torgið og kirkjuturninn við Dómkirkjuna. Hvort sem rölt er milli líflegra kaffihús og ísbúða eða komið við á markaðnum þar sem heimamenn selja hunang, fíkjur, ferska ávexti og osta, munu allir finna sér eitthvað skemmtilegt til dundurs í Zadar. Við sjávarsíðuna má finna verk Nikola Basic „sjávarorgelið“ frá 2005, en það er hljóðlistauppsetning sem framleiðir tónlist hafsins með hjálp frá öldunum og orgelpípum. Fjöldi skoðunarferða er í boði á vegum Costa Cruise sem keyptar eru fyrir eða á meðan siglingu stendur. Hægt er að skoða allar skoðunarferðir sem í boði eru um leið og bókun hefur verið gerð.
Skipið fer úr höfn kl.18:00 og er mikilvægt að vera komin tímanlega um borð.

Komið er til Kotor í Svartfjallalandi kl.13:00 og er eindregið mælt með því að vera úti þegar siglt er inn Kotorflóann, fegurðin er einstök! Borgin Kotor tilheyrði Rómaveldi allt frá 3.öld fyrir Krist. Á býsanska tímabilinu var bærinn víggirtur með glæsilegum borgarmúrum sem teygja sig eina 4,5 km meðfram strönd Kotorflóa. Elsti hluti borgarinnar er á heimsmynjaskrá UNESCO. Hægt er að velja um fjölda skoðunarferða til kaups hjá Costa Cruise.
Siglt af stað kl.20:00.

Komið er til Dubrovnik kl.07:00 að morgni en Dubrovnik er ein aðal menningar- og listaborg Króatíu. Lífleg og sögufræg borg sem hefur að geyma fjölmargar glæstar byggingar frá endurreisnar- og barokktímabilunum. Gaman er að skoða gömlu virkisveggina sem ná utan um elsta hluta hennar. Hægt er að velja um fjölda skoðunarferða sem hægt er að kaupa hjá Costa Cruise.
Siglt er af stað kl.17:00.

Grikkir kalla hana Kerkyra, en annars er hún þekkt sem Corfu, og er hrífandi eyja sem í áraraðir hefur glatt gesti sína með náttúrutöfrum, glæsiströndum og einstakri upplifun. Komið er til Corfu kl.09:00 að morgni. Eyjan á sér heilmikla sögu, en þar hafa bæði Frakkar, Bretar og Ítalir ráðið ríkjum. Fornar byggingar og minjar standa þar enn, vel varðveittar. Má þar nefna gamla bæinn í Corfu Town sem er á heimsminjaskrá UNESCO, gamla virkið (Palaio Frourio), og nýja virkið (Neo Frourio). Eins og áður þá er fjöldi skoðunarferða í boði sem hægt er að kaupa hjá Costa Cruise.
Siglt af stað kl.18:00.

Komið er til Bari á Ítalíu kl.08:00.
Bari er höfuðborg Pugliahéraðsins á Suður-Ítalíu. Upprunalega var Bari grísk nýlenda en varð síðar mikilvægur ítalskur verslunarstaður. Elsti borgarhlutinn (Bari Vecchio) er á höfða milli gömlu og nýju hafnarinnar en í honum er eins tíminn hafi staðið í stað. Þar má finna þröngar litlar götur, börn í fótbolta, eldri menn að reykja og spjalla, eldri konur að hengja upp þvott og 40 kirkjur! Ekki gleyma að rölta um gömlu höfnina þar sem fiskibátarnir koma að landi með feng dagsins og selja fenginn beint úr bátnum. Í Bari má einnig finna lengsta hafnargarð Ítalíu sem byggður var af Mussolini á sínum tíma, Longomare. Fjöldi skoðunarferða er í boði á vegum Costa Cruise sem keyptar eru fyrir eða á meðan siglingu stendur.
Lagt úr höfn kl.18:00.

Síðasti áfangastaður siglingarinnar er Split í Króatíu áður en siglt verður aftur til Feneyja. Komið er að höfn kl.08:00 og má hér finna meðal annars rúmlega 1700 ára gamla höll rómverska keisarans Diocletian, en höll þessi var notuð sem tökustaður í Game of Thrones á sínum tíma. Þröngar götur með tónlistarmönnum, skemmtilegir barir og litlar verslanir, götulistafólk og margt fleira ber fyrir augu í þessari fallegu borg. Fjöldi skoðunarferða í boði hjá Costa Cruise.

Komið er til Port Marghera kl.09:00 og bíður þá rúta eftir hópnum sem flytur okkur til smábæjarins Quarto D´Altino þar sem við innritum okkur á Hotel Crowne Plaza Venice East. Crowne Plaza er gott 4 stjörnu hótel, staðsett rétt hjá lestarstöð bæjarins en þaðan er hægt að taka lest beint yfir til Feneyja fyrir 3,50 eur á mann. Nafn bæjarins er dregið af rómverska bænum Altino (Altinum) frá tímum Rómaveldis, en sagan segir að bærinn hafi verið stofnaður árið 452 af flóttamönnum frá Feneyjum sem voru að flýja undan Atla Húnakonungi.
Hér verður gist síðustu nóttina og slakað á eftir ævintýri síðustu daga.

Rúta flytur hópinn á flugvöllinn um kl.15:30 – 16:00
Brottför frá Feneyjarflugvelli kl.19:20 að staðartíma með OS530 til Vínarborgar. Lending í Vínarborg er kl.20:20 að staðartíma og áfram er flogið kl.21:00 þaðan. Lending í Keflavík er kl.23:20 að staðartíma.