Lecce, Puglia

Lecce er töfrandi borg staðsett í suðurhluta Ítalíu í Puglia héraði á Salentoskaganum. Borgin hefur oft verið kölluð Flórens suðursins, en Lecce er ein af elstu borgum Ítalíu og eitt best varðveitta leyndarmál hvað varðar sögu, arkitektúr og umhverfi. Lecce er að mestu byggð úr gulleitum kalkteini sem skapar töfrandi andrúmsloft með glæstum arkitektúr en Lecce er þekkt fyrir skrautlegar byggingar og styttur í barrokkstíl sem setja svip sinn á borgina. Út um allt má sjá kirkjur og hallir sem eru skreyttar flóknum útskurði og skreytingum. Dæmi um slíkt er Dómkirkjan sem staðsett er í miðbæ Lecce við Piazza del Duomo torgið en það torg þykir eitt fallegast torg borgarinnar. Þessi fallega dómkirkja, biskupahöllin og helgilistasafnið standa andspælis hvort öðru við torgið en þar má einni finna Episcopio klukkuturninn og má segja að þetta sé veisla fyrir barrokkunnendur. Basilica of Santa Croce er annað dæmi um fallega byggingu í barrokkstíl en hún er staðsett við Piazza di Santa Croce og hefur verið grafstaður merkra Ítala eins og Michelangelo, Galileo og Machiavelli.

Matur og menning

Puglia er eitt af fremstu héruðum í heimi við framleiðslu ólífuolíu. Matargerð í Puglia sækir mikinn innblástur til Grikklands, nágrannaþjóðar Ítalíu, enda er stutt að sigla yfir á ferju til næstu hafnarbæja. Lecce er þekkt fyrir dýrindis matargerð enda státa markaðir af fersku hráefni, ólífuolíu og víni af svæðinu. Hefðbundnir réttir eins og pasticciotto (rjómafyllt sætabrauð og orecchiette sem er þetta litla eyrnaskapaða pasta sem er oft borið fram með brokkolí eða ríkri tómatsósu eru meðal rétta sem hægt að gæða sér á í Lecce. Þar sem Puglia er við stöndina er ferskur fiskur og sjávarréttir einnig gífurlega vinsælir. Matsölurstaðir bjóða bæði upp á hefðbundna rétti sem og nútímalegar uppskriftir af klassískum réttum. Þar sem fjöldinn allur af veitingahúsum, pizzeríum, litlum börum og kaffihúsum er í borginni ættu allir að geta fundið eitthvað við sitt hæfi.  Ferðamenn ættu ekki heldur að láta það fram hjá sér fara að smakka caffé leccese sem er hefðbundið ískaffi sem aðeins er hægt að fá á Salento svæðinu. Caffé leccese var fundið upp í Lecce um 1950 af Quarta fjölskyldunni og þykir vinsælt að drekka það í hinum mikla hita sem herjar á íbúa á þessum suðrænu slóðum. 

Verslun í Lecce

Via Salvotore Trinchese er yndisleg gata í Lecce sem við mælum með að rölta um en þar má finna líflegt andrúmsloft og heillandi verslanir. Þetta er frábær staður til að skoða verslanir sem eru með vörur af svæðinu eða kíkja í handverksverslanir og þarna er líka hægt að fá sér bita á notalegu kaffihúsi. Via Giuseppe Palmieri er önnur heillandi gata með tískuvöruverslunum þar sem hægt að fá fá hönnun af svæðinu og einstaka minjagripi. Við hið líflega torg Piazza Sant’Oronzo er tilvalið að kíkja í verslanir en þar má bæði finna handverk og töff fatnað. Mercato di Lecce er skemmtilegur markaður þar sem hægt er að finna handgerðar vörur og aðrar hefðbundnar vörur frá Puglia. Corso Vittorio Emanuele II er hjartsláttur Lecce! Þessi iðandi gata er með verslunum, kaffihúsum og sögulegum byggingum. Fullkomið fyrir rólegan göngutúr á meðan þú verslar þér tískuvörur eða nýtur þess að borða ítalskan gelato (ís).

Vert að sjá

Trulli húsin í Alberobello eru í um klukkutíma fjarlægð frá miðbæ Lecce og eru vel þess virði að gera sér ferð til að sjá. Húsin eru gerð úr kalksteini og voru byggð á 14. öld en þau eru skráð á heimsminjaskrá UNESCO vegna sérstöðu sinnar. Trulli húsin eru ekki bara falleg, heldur hafa þau líka sögulegt gildi, þar sem þau voru byggð til að forðast skatta. Þau eru oft máluð í hvítum lit með táknrænum merkingum á þakinu.