Jólasól í Taílandi

Stingum af úr myrkri Íslands á miðjum vetri í exótík og dásemd við miðbauginn þar sem veðrið er hlýtt og sólin trygg. Höldum á vit ævintýra Taílands þar sem framandleikinn er samt svo blíður og þægilegur.

Flogið að morgni með Icelandair til Kaupmannahafnar eða Osló og lent þar að hádegi og rúmum tveimur tímum síðar – eftir smörrebröd og öl – er haldið áfram með Emirates flugfélaginu til Dúbaí þar sem millilent áður en síðasti leggurinn er floginn til Bangkok þar sem lent er á hádeig þar sem klukkan er 7 stundum á undan Íslandi.

Farþegar eru sóttir út á flugvöll og ekið til strandbæjarins Hua Hin. Við komu er bærinn kynntur í stuttri ferð um helstu staði, svo farþegum gefist kostur á að ná áttum og kynnast því sem í boði er.

Í boði eru þrjár ferðir:

28 daga ferð frá 13. desember til 9. janúar. 3 vikur í Hua Hin/Cha Am(14/12-4/1) og 4 nætur í Bangkok(4.-8. janúar).

22 daga ferð frá 15. desember til 5. janúar. 15 nætur í Hua Hin(16. til 31. desember) og 4 nætur í Bangkok(31/12-4/1).

16 daga ferð frá 18. desember til 2. janúar. 10 nætur í Hua Hin(19. til 29. desember) og 3 nætur í Bangkok(29/12-1/1)

Sökum langrar sögu sem strandstaður og afdrep Bangkokbúa er Hua Hin ólíkur öðrum strandstöðum Taílands.

Þetta er myndarlegur bær með gömlum bæjarkjarna auk dæmigerðar strandgötu þar sem veitingastaðir og barir standa. Sjávarréttarstaðirnir niður við hafnarsvæðið eru jafnt vinsælir af heimamönnum sem ferðafólki. Frá gömlu höfninni hlykkjast götur þar sem barir, næturklúbbar, götusalar, markaðir og veitingastaðir standa hver við annan. Við ströndina er alltaf eitthvað við að vera og boðið upp á úrval afþreyingar s.s. hestaferðir, skútusiglingar og bátaleigu. Margir af bestu golfvöllum landsins eru í næsta nágrenni, inn á milli lítilla fiskibæja og sveitaaþorpa.

Fyrir náttúruunnendur eru tveir spennandi þjóðgarðar skammt undan. Kaeng Krachan þjóðgarðurinn með sitt fjölskrúðuga fuglalíf og Khao Sam Roi Yot sem státar t.d. af glæsilegum kalksteinsklettum.

Eftir góða daga og jólahald í Hua Hin er ekið til Bangkok þar sem önnur ævintýri bíða farþega í þessum skrautlegu og skemmtilegu borg þar sem veitingar, skemmtun og verslunarmöguleikar eru óþrjótandi. Dvalið verður 3-4 nætur í Bangkok á vel staðsettum og vönduðum hótelum og áfram fylgir íslenskur fararstjóri hópnum eftir og veitir ráð um veitingar, skemmtun og verslunarmöguleika auk þess að bjóða uppá fjölda valfrjálsra ferða.

Bangkok er algjör andstæða Hua Hin, hér er ys og þys og borgin sefur aldrei enda alvöru asísk megaborg. Maturinn er eitthvað sem enginn má missa af en það er varla þverfótað fyrir litlum götuveitingastöðum þar sem hugsanlega finnast bestu máltíðir ferðarinnar.

Síðasti dagurinn í Taílandi er drjúgur því ekki er flogið fyrr en eftir miðnætti og því hægt að nýta daginn í ýmiss erindi og skemmtun í Bangkok. Flogið eftir miðnætti og farin sama leið, um Dúbaí og Kaupmannahöfn og lent undir miðnætti í Keflavík. Flogið er með Icelandair og Qatar og farþegar bókaðir alla leið til Keflavíkur sem þýðir að ekki þarf að hafa áhyggjur af innritun farangurs við millilendingu.

Á meðan á ferðinni stendur er íslenskur fararstjóri Úrval Útsýn ávallt til taks með ráðleggingar og aðstoð við farþega auk þess sem innlendur leiðsögumaður er til aðstoðar.

Fjöldi valfrjálsra ferða er í boði bæði í Hua Hin og Bangkok sem fararstjóri kynnir farþegum og aðstoðar við bókun.

Undirbúningur

Undirbúningur fyrir ferðina er einfaldur. Helst þarf að gæta að þrennu tímanlega:

• Vegabréfum
• Ferðatryggingum 
• Bólusetningum

Vegabréf þurfa að gilda minnst 6 mánuðum umfram áætlaða heimkomu og íslendingar fá 30 daga landvistarleyfi í Taílandi við komu án nokkurra formála. 

Farþegar þurfa að gæta að því að vera með gildar ferðatryggingar sem flestir hafa innifaldar í greiðslukortatryggingum eða heimilistryggingum.

Farþegum er bent á að hafa samband við næstu heilsugæslu eða leita til Ferðaverndar (ferdavernd.is) og kanna hvaða bólusetningar eru gildar og fá ráð um hvort þörf sé á frekari bólusetningum m.v. áfangastaðinn.