Egyptaland

Flug með Neos frá Keflavík kl 08:30 til Hurghada. Frá flugvelli verður haldið á 5* hótel í Hurghada þar sem gist verður í 3 nætur við Rauða hafið og safnað þreki fyrir heillandi ævintýrin framundan.

Frjáls dagur í Hurghada. Gist í Hurghada.
Innifalið: Morgunverður, hádegisverður og kvöldverður.

Snorkl skoðunarferð. Gist í Hurghada.
Innifalið: Morgunverður, hádegisverður og kvöldverður.

Flogið til Cairó um morguninn og tékkað inn á 5* hótel og gist í eina nótt.

Heillandi skoðunarferð um Cairo.
Í dag skoðum við Giza píramídana , eitt af sjö undrum veraldar og það eina sem enn stendur. Giza píramídarnir eru í raun þyrping nokkurra píramída og annarra bygginga sem eru taldar byggðar um 2.400 árum f. Kr. Helstu minjarnar eru þrír stórir og sex litlir píramídar, hinn mikli Sphinx og Grafar-hofið. Stærsti pýramídinn og sá elsti er 147 metra hár, í honum eru 2,3 milljónir tilhöggnir steinar og bygging hans tók um 20 ár. Sphinx, ljónið með mannshöfuðið, er höggvin út í kalkklett og er ein stærsta stytta heims. Grafarhofið var meðal annars notað til að breyta búkum látinna konunga í múmíur.
Ferðin heldur síðan áfram að Sakkara píramídanum sem er talinn vera elsta stórframkvæmd forn Egypta og var byggður á tíma Djesre konungs um 2.700 árum f. Kr. Píramídinn er tröppulaga með sex lögum hvert ofan á öðru og er um 62 metra hár.
Innifalið: Morgunverður og hádegisverður.

Þennan dag verður haldið á vit leyndardóma Kairóborgar og munum við meðal annars skoða gamla hlutann af borginni “Old Cairo” og egypska safnið þar sem til sýnis eru yfir 120.000 hlutir og minjar frá síðustu 5000 árum. Þar má m.a. skoða múmíur, styttur og muni af margvíslegu tagi og ein deild safnsins er tileinkuð Tutankhamun faraó sem lá í grafhýsi sínu í 3.500 ár ásamt fjársjóði, gulli og skartgripum.
Einnig munum við kíkja á Khan El Khalili basarinn sem er elsti og frægasti markaður Mið-Austurlanda (settur á stofn árið 970) og þótt víðar væri leitað. Hér má gera reyfarakaup og rétt verð ræðst af sannfæringarkrafti viðskiptavina og kaupmanna.
Í lok dags verður flogið til Aswan og gist eina nótt.

Innifalið: Morgunverður og hádegisverður.

Helsta kennileitið eru hinar tvær geysistóru Aswan stíflur sem byggðar voru við efstu flúðir Nílar. Fyrstu ráðagerðir um stíflugerðina voru undir lok 19. aldar og Bretar reistu fyrstu stífluna árið 1902. Hún reyndist allt of lág og var hún hækkuð í tvígang án árangurs. Þá var ákveðið að reisa aðra stíflu ofar í ánni. Eftir byltingu Nassers 1952 virtust þær áætlanir í sjónmáli og Bandaríkjamenn og Bretar buðu lán til verksins. Erjur á svæðinu urðu til þess að Bretar og Bandaríkjamenn drógu lánsloforð sitt til baka. Nasser ákvað þá að þjóðnýta Súez-skurðinn, sem dró dilk á eftir sér, en tekjurnar af honum nýttu egypsk stjórnvöld þó til að ýta framkvæmdum úr vör. Sovétmenn komu síðan Egyptum til hjálpar með myndarlegri peningagjöf og stíflan varð að lokum hönnuð af Kremlarbúum.
Framkvæmdir hófust árið 1960 og miðlunarlónið náði fullri hæð árið 1976. Tilgangurinn með stíflugerðinni var að jafna vatnsmagnið í Níl og binda endi á flóð- og þurrkatímabil, auk þess að framleiða rafmagn og veita vatni í áveitukerfi til jarðræktar. Við skoðum þessa miklu framkvæmd sem hefur haft mikil jákvæð áhrif á egypskt samfélag.
Þá heimsækjum við Unfinished Obelisk og sjáum ókláraða steinsúlu (obelisk) sem fannst fyrir um 100 árum. Súlan er tileinkuð Hatshepsut drotningu sem var uppi fyrir um 3500 árum síðan.
Síðan skoðum við Philae hofin sem eru um 12 km frá Aswan.
Philae hofin eru tileinkuð gyðjunni Isis, sem hafði mörg hlutverk, m.a. stýringu helgisiða sem tengdust dauða, hún lífgaði framliðna, læknaði veika og var fyrirmynd móðurhlutverksins. Hofin hafa þá einstöku sögu að þangað komu pílagrímar um margra alda skeið; Egyptar, Grikkir og Býsans-búar frá Aust-rómverska keisaradæminu ( 395-1453 e. Kr.). Til að koma í veg fyrir að hofin færu á kaf við stíflugerðina í Níl voru þau hlutuð sundur og flutt ofar þar sem þau voru reist óbreytt, stein fyrir stein. Verkið var framkvæmt og kostað af UNESCO, Menningarstofnun Sameinuðu þjóðanna.
Um hádegi er innritað í fljótabátinn fyrir siglingu á Níl, hádegisverður um borð.
Gist í 3 nætur í 5* fljótabát á Níl.
Innifalið: Morgunverður, hádegisverður og kvöldverður.

Fyrsti viðkomustaður á siglingunni verða Kom Ombo hofin, sem standa á Nílarbökkum.
Kom Ombo hofin eru í yngra lagi og voru byggð 180-47 f. Kr. Þau eru einstök að því leyti að þau eru tvöföld og spegilmynd hvors annars, þ.e. salir, gangar, helgistaðir og aðrir íverustaðir voru eins byggðir í tveimur einingum og hvor um sig var tileinkuð einum guði. Önnur byggingin var musteri krókódílaguðsins Sobek, frjósemisguði og skapara heimsins. Hin byggingin var helgihús fálkaguðsins Hórusar, sonar Isis og Ósíris en þau voru systkin. Hlutverk Hórusar breyttist eftir því sem tímar liðu en helst er hann kenndur við himinhvolfið. Sannarlega kyngimagnaður staður!

Eftir heimsóknina í Kom Ombo heldur siglingin áfram til Edfu
Innifalið: Morgunverður, hádegisverður og kvöldverður.

Edfu hofið er eitt best varðveitta musteri forn-Egypta. Það var byggt á árunum 237-57 f. Kr. þegar Grikkir og nágrannar þeirra, Makedóníumenn, og enn seinna Rómverjar, höfðu erft Egyptaland eftir fráfall Alexanders mikla árið 323 f. Kr. Upphaflega var hofið tileinkað egypska guðinum Hórusi en fljótlega tók gríski guðinn Apollo hofið yfir, en Grikkir samsömuðu Apollo við Hórus. Á veggjum hofsins eru margar áritanir sem lýsa í smáatriðum byggingu þess og gefa margskonar upplýsingar um tungumál, trúarbrögð og dulmögn í Egyptalandi á tímum Grikkja. Tilbeiðsla í Edfu rann út í sandinn þegar Þeódósíus Rómarkeisari bannaði öll önnur trúarbrögð en Kristni á 4. öld e. Kr. Sú var raunin um mörg þau musteri sem voru enn við lýði í Egyptalandi og kristinn múgur rústaði fjölmörgum öðrum tilbreiðslum fornra trúarbragða. Af einhverjum ástæðum var musterunum í Edfu hlíft og þau féllu í gleymskunnar dá uns þau fundust á ný í sandinum árið 1860.
Siglt áleiðis til Luxor.
Innifalið: Morgunverður, hádegisverður og kvöldverður.

Eftir morgunverð tékkar hópurinn sig út af Nile Cruise fljótabátnum og þá liggur leiðin til Luxor sem er stútfull af forvitnilegum og glæsilegum fornminjum.
Við byrjum á að skoða Karnak hofrústir. Þær eru staðsettar skammt norður af Luxor og eru líklega einar tilkomumestu, fjölbreyttustu og sannarlega stærstu rústir hins forna Egyptalands. Hofsvæðið samanstendur af fjórum musterum sem teygja sig yfir um 250 ekrur lands (1 ekra = ca. 4.000 ferm.) og er afrakstur uppbyggingar fjölmargra kynslóða í yfir 1700 ár, u.þ.b. frá 2050-300 f. Kr. Nú er aðeins einn hluti svæðisins opinn fyrir gestum og sá er tileinkaður sólguðinum Amon-Ra. Karnak er næst vinsælasti viðkomustaður ferðamanna í Egyptalandi (næst á eftir Giza-píramídunum).
Þá heimsækjum við Dal konunganna. Hér voru teknar steingrafir í tveimur dölum, eystri og vestari, á tímabilinu 16.-11. öld f.Kr. fyrir látna faraóa og æðstu embættismenn. Þegar síðustu (að talið er) grafir fundust árið 2008 hvíla hér jarðneskar leifar 63 forn-Egypta. Hinar konunglegu grafir eru skreyttar hvelfingar þar sem m.a. fundust ýmsir hlutir og tól sem gott var fyrir faraóanna að hafa með sér yfir móðuna miklu. Illu heilli hafa grafarræningjar gert sig heimakomna í flestum grafanna en þær gefa þó góða mynd af grafsiðum fornra tíma.
Næst liggur leið að grafhýsi Hatseput faraós en hún var önnur af tveimur konum sem komust til æðstu metorða. Hatseput var faraó um hálfrar aldar skeið 1507-1458 f. Kr. en hafði í raun stjórnað ríkinu í umboði barnungs sonar síns, Tútmosar III, nokkur ár á undan. Faðir hans, Tútmos II , var eiginmaður og jafnframt hálfbróðir Hatseputar . Sérfræðingar í sögu forn-Egypta telja að Hatseput hafi verið einn farsælasti faraó Forn-Egypta og margir benda einnig á að hún sé fyrsta nafngreinda kona mannkynssögunnar. Stjórnarár Hatsputar voru miklir framkvæmdartímar í Egyptalandi og m.a. reisti hún sér stórt og tignarlegt minningarhof skammt frá Dal konunganna sem haldist hefur í ótrúlega góðu ásigkomulagi, þótt skrautgarðar á hverjum stalli séu fyrir bí.
Frá minningarhofi Hatseputar liggur leiðin að risastyttum Memnons sem reistar voru á valdatíma Amenhoteps III faraós um 1350 f. Kr. og voru hluti af minningarhofi hans. Memnon var ein af hetjum Trójustríðsins og var konungur í Eþíópíu sem leiddi her sinn alla leið til Tróju á strönd Tyrklands í dag til að verja borgina fyrir árás Grikkja. Stytturnar, sem eru um 18 m. háar og vega hvor um sig 720 tonn, voru mótaðar í steinnámu nærri Cairó og fluttar landleiðina um 700 km leið því þær voru of þungar til að hægt væri að fleyta þeim upp Níl. Stytturnar hafa látið á sjá en Rómverjar reyndu að lagfæra þær og því sýnast stytturnar ekki vera gerðar úr einni steinblokk sem var raunin í upphafi.

Gist á 5* hóteli í eina nótt í Luxor.
Innifalið: Morgunverður og hádegisverður.

Ekið til Hurghada og gist á á 5* hóteli í eina nótt.
Frjáls dagur í Hurghada.
Innifalið: Morgunverður og kvöldverður.

Ekið á flugvöll í Hurghada eftir morgunverð.
Innifalið: Morgunverður.