Hringferð um Balí

Á Balí má kynnast dularfullri og seiðandi menningu eyjarskeggja, sjá dans barongskrímslanna, hlusta á bambus-sílófóna, láta dáleiðast af þokkafullum fingrum og stjörfum augum legong-dansaranna eða færa hindúaguðinum Visnú fórnir. 

Náttúrufegurð Balí er stórkostleg, þar skiptast á tignarleg fjöll og grösugir dalir, beljandi ár og sindrandi lækir, kraumandi eldstöðvar og tær fjallavötn, hvítar strendur og háir sjávarhamrar. Landslagið er því að nokkru leyti kunnuglegt Íslendingum en veðrið og menning íbúanna af framandi toga. Í þessu fagra umhverfi er margt hægt að gera sér til skemmtunar og dægradvalar. 

Á Balí má stunda margs konar æsandi útiveru með leiðsögn fagmanna svo sem köfun, brimbrettabrun, fjallaklifur, fljótasiglingar, kajakadól, skútusiglingar, hjólreiðar, stórfiskaveiðar og margt margt fleira. 

Við komu til Balí er ekið til strandbæjarins Seminyak við vesturströnd Badungtanga og á þeim dögum er suðurhluti Balí skoðaður auk þess sem bærinn sjálfur og nágrenni er kannað.

Eftir langt flug þar sem farið er austur um átta tímabelti og suður fyrir miðbaug er líka nauðsynlegt að eiga rólega daga og venjast ólíku loftslagi og fá tækifæri til að setja sig inn í þann framandi heim sem bíður ferðalanga á Balí og byrjar ferðin því rólega.

Eftir góða daga við ströndina er haldið til fjalla þar sem dvalið er í hinum mistíska og framandi Úbúdbæ sem hefur mest aðdráttarafl allra staða á Balí fyrir þá sem vilja kynnast sérstæðri menningu, listum og trúarsiðum íbúa Balí. Frá Úbúd er stutt til flestra fegurstu og forvitnilegustu staða á Balí og verður farið í dagsferðir þaðan auk þess sem gengið verður um bæinn með leiðsögumanninum og nágrennið kannað á varfærin og náin hátt.

Það er einhver útópískur hljómur í Úbúd sem fer ekki fram hjá neinum. Bærinn hefur verið þekktur sem miðja handverks og lista í gegnum tíðina og sl. áratugi hefur sú menning eflst með komu erlendra listamanna. Úbúd er víðfeðmur bær sem liggur um hæðir og dali Giyaniar konungsdæmisins. Kjarninn er við gamla markaðinn og konungshöllina þar sem stiginn er barong dans á hverju kvöldi og gammalan tónlist hljómar. Hvergi á Balí er eins auðvelt að nálgast og kynnast arfleifð og menningu eyjarskeggja en í Úbúd. Einstakt handverk jafnt í gömlum tréskurði, silfurverki og steinhöggi sem nútímalegum málverkum og skúlptúr. Þarna eru reyktir blúsbarir og djassbúllur, hippaleg kaffihús í bland við smarta veitingastaði og glæsilega vínbari. Allt er bútík og flott. Það er einhver hönnun og stæll á öllu þarna þó svo að allt sé svo gamalt og rótgróið. 

Frá fjöllum Úbúd er svo haldið austur í hin fornfrægu konungsdæmi Karangasem og Klungkung en áður en hollendingar lögðu Balí undir var Balí skipt upp í átta konungsdæmi og enn gætir mikilla áhrifa þeirra t.d. eru konungsfjölskyldurnar enn með völd í trúarlegum efnum og búa í sínum höllum sem nefnast Puri. Dvalið verður í strandbænum Candidasa í tvær nætur og dómshúsið Kerta Gosa í Klungkung skoðað með sínum einstæðu málverkum sem eru í svokölluðum wayang stíl og öll eru verkin stef við trúarhefð heimamanna. 

Frumbyggjar Balí nefnast Balí Aga og búa þeir í einangruðum þorpum og halda sínum venjum og hefðum óbreyttum frá fornri tíð. Við heimsækjum þorpið Tenganan þar sem okkur gefst kostur á að kynnast menningu þeirra sem er að flestu leiti ólík því sem annarsstaðar finnst á eyjunni.

Á leið frá Candidasa og aftur til stranda Seminyak þegar þrír dagar eru eftir á Balí verður komið við í Goa Lawah hofinu, sem er hellir þar sem þúsundir leðurblakna halda til og hanga yfir fornu musteri.

Á síðustu dögunum á Balí verður dvalið í vellystingum í Seminyak sem er sá strandbær sem býður uppá mest úrval og hæstu gæði í veitingum og allri þjónustu á gjörvallri eyjunni. Þarna gefst leiðangursfólki tækifæri til að hvílast vel og melta þær mögnuðu upplifanir og dásamlegu staði sem borið hafa fyrir augu þeim þeim 10 dögum sem liðnir eru á Balí. Fjöldi valfrjálsra ferða í boði fyrir þá sem enn þyrstir í ævintýri og upplifanir.

Flugleiðin til Balí

Það er ekki stutt leiðin frá okkar norrænu eyju suður til hinnar suðrænu eyju nánast hinum megin á hnettinum. Því höfum við valið sérlega þægileg flug með Emirates og Icelandair. Einn flugmiði alla leið sem gefur fólki möguleika á að innrita farangur alla leið frá Keflavík til Denpasar á Balí og um leið að hafa tengiflugin tryggð.

Hótelin á Balí

Dvalið verður á afbragðs hótelum á þremur stöðum á eyjunni:

Grand Mercure Seminyak

Grand Mercure hótelið í Seminyak er frábært afdrep í miðjum bænum með alla þjónustu og myndarlegt sundlaugasvæði en um leið umkringt ys og þys bæjarins með úrvali skemmtistaða veitingastaða og allri almennri þjónustu utan hótelveggjanna. Hótelið er steinsnar frá ströndinni eða í rétt um mínútu göngufjarlægð. 

Komaneka Rasa Sayang

Komaneka hótelin eru þekkt fyrir einstaka hönnun og elegans í umhverfi og þjónustu. Það á jafnt við um herbergin, veitingastaðinn eða sundlaugasvæðið allt er sérlega fagurt og þokkafullt. 

Þjónusta er jafn blíð og fagleg einsog umhverfið er dýrlegt. Ekki spillir fyrir að hótelið er staðsett á miðri Monkey Forest Road sem er aðalgatan í Úbúdþorpinu í nálægð við alla frægustu og bestu veitingastaðina og fjölbreytta þjónustu.

Á vesturlandinu verður dvalið á Ramayana í Candidasa sem er þægilegt og gott hótel niður við ströndina þar sem útbúin herbergi og afbragðs veitingastaðir leggja grunn að góðri vist. Og að sjálfsögðu er heilsulind og nudd á staðnum.

Hafðu samband við asiuferdir@uu.is og við sendum nánari upplýsingar um ferðina.