Töfrar Jórdaníu

Brottför frá Keflavík 17.október klukkan 13:55. Flogið með Lufthansa í gegnum Frankfurt og lent í höfuðborg Jórdaníu, Amman, klukkan 02:20. Farþegar sóttir á flugvöll og ekið á Grand Hyatt hótelið þar sem gist verður í 4 nætur.

Léttur dagur eftir langt ferðalag.
Morgunverður verður opinn fyrir hópinn til kl.10:30 þar sem komið er seint á hótelið nóttina áður. Eftir hádegið, kl.13:30, er farið í létta skoðunarferð um Amman. Við heimsækjum Jebel al-Qala´a (á ensku The Citadel) með leifum af Rómverska leikhúsinu, borgarvirkið og Umayyad höll þar sem frábært útsýni er yfir Amman. Einnig verður þjóðminjasafnið skoðað (The National Archaeological Museum). Síðan verður gefinn kostur á að rölta um gamla bæinn til að skoða og versla áður en haldið verður tilbaka á hótelið. Frjálst kvöld.

Eftir morgunverð keyrum við til grísk-rómversku borgarinnar Jerash sem oft er kölluð borg hinna þúsund súlna. Þar eru þær stærstu rómversku rústir sem varðveist hafa hvað best utan Ítalíu og er borgin oft kölluð Pompeii Mið-Austurlanda. Jerash er ein af Decapolisborgunum (10 grískar borgir í mið-Austurlöndum á fornöld) og hefur borgin að nokkru leyti varðveist óspillt. Þar má vel greina hina miklu velmegun fyrri ára á súlnaröðum aðalgötunnar og í hinu fallega Oval Piazza hringleikahúsi. Síðan liggur leiðin til Ajlun sem er fræg fyrir flottasta arkitektúr á hervirki í öllum mið-Austurlöndum en þar réð sjálfur Saladin ríkjum. Þá njótum við útsýnis yfir Jórdandal. Ferðin heldur síðan áfram til Um Qais borgar sem einnig er ein af Decapolisborgunum og kallaðist á þeim tíma Gadara. Borgin er fræg fyrir svartar basalt rústir frá tímum Grikkja. Héðan horfum við einnig yfir Gólanhæðir og Tiberiusvatn (The Sea of Galilee). Snúum aftur til Amman og eigum frjálst kvöld.

Eftir morgunverð leggjum við af stað út í eyðimörkina til að skoða kastalana Al Kharaneh, Qasr Amra og Al Azrag. Þeir voru byggðir af Umayyödum til að hýsa gesti og veiðimenn en Umayyadar voru fyrsta múslima-ættarveldið til að stjórna keisaraveldi kalífadæmisins 661-750 e.Kr. Veggir og gólf kastalanna eru skreytt flísum og mósaík en Amra kastalinn er á heimsminjaskrá UNESCO. Al Azraq var bústaður Arabíu-Lawrence á meðan á arabísku byltingunni stóð. Komið tilbaka til Amman og gist á Grand Hyatt. Frjálst kvöld.

Eftir morgunverð tökum við ferðatöskurnar með okkur, yfirgefum Grand Hyatt hótelið og leggjum í hann eftir Þjóðvegi Konungsins. Það er gömul leið sem full er af sögu af kaupmönnum, hermönnum og pílagrímum sem allir fóru þennan veg fyrir mörgum öldum síðan og tilheyrði þá gömlu silkileiðinni. Fyrsta stoppið okkar er í hinni kristnu borg Madaba sem einnig gengur undir nafninu Mósaíkborgin. Þar skoðum við St.George kirkjuna sem er fræg fyrir meistaraverk sitt sem er Byzantine mósaíkkort af heilaga landinu sem nær aftur til 6. aldar og sýnir Jerúsalem ásamt öðrum borgum. Eftir það förum við í fornleifagarð og skoðum rústir nokkurra kirkna fra byzantískum tíma, frægust af þeim er Church of the Virgin. Í garðinum er einnig skóli sem kennir varðveislu og viðgerð fornra mósaíkmynda. Síðan er lagt af stað upp á Nebo fjall sem er einn heilagasti staður Jórdaníu með rústum frá 4. til 6. öld. Það er einmitt þar sem Móses á að hafa farið upp og Guð sýndi honum fyrirheitna landið. Móses á einnig að vera grafinn þar. Á björtum degi er hægt að sjá alla leið til Jericho og Jerúsalem. Við heimsækjum klaustrið og Moses Memorial kirkjuna.
Eftir það er ferðinni heitið áfram inn í stærstu eyðimörk Jórdaníu, Wadi Rum, þar sem mikil ævintýri bíða okkar. Wadi Rum er með stórkostlegu eyðimerkurlandslagi og einstaka náttúrufegurð. Inni í eyðimörkinni hittum við Bedúína og förum með þeim í jeppasafarí um eyðimörkina fram að sólsetri. Eftir sólsetur fáum við kvöldverð í Bedúínatjaldi og gistum í Rum Oasis Luxury Camp, 4 stjörnu deluxe tjaldhóteli í miðri eyðimörkinn. Upplifun sem ekki allir hafa prufað áður

Eftir morgunverð verður haldið til borgarinnar Petru „rósrauðu borgarinnar sem er helmingi eldri en tíminn sjálfur“. Borgin var byggð af Nabateumönnum fyrir 2000 árum sem höfuðborg þeirra. Borgarrústirnar eru hönnunarundur, byggðar voru úr mislitum steinum, sem vakið hafa hrifningu um heim allan. Við hefjum ferðina á hestbaki fyrir þá sem það vilja en göngum síðan það sem eftir er dags um borgina sem liggur niður í sprungu (Siq) milli tveggja slútandi kletta. Látum borgina heilla okkur og njótum þessa stórkostlega staðar áður og endum á því að skoða hið fræga minnismerki Petra “The Treasury”.
Tékkað inn á hótelið “Hayat Zaman” í Petru. Frjálst kvöld.

Eftir morgunverð er farið af stað til Aqaba; glugga Jórdaníu við Rauðahafið á jaðri Aqaba-flóa. Aqaba er umkringt háum eyðimerkurfjöllum og því notalegt loftslag allt árið um kring. Svæðið er vel þekkt fyrir lúxushótel og strandsvæðin. Þeir sem hafa áhuga á köfun eða snorkli geta notið þess að skoða eitt best varðveittasta kóralrif heims. Frjáls dagur í Aqaba, gist í 2 nætur á Al Manara Luxury Collection með morgunverði inniföldum.

Frjáls dagur í Aqaba.

Eftir morgunverð verður haldið í átt að Dauðahafinu, lægsta yfirborðspunkti jarðar. Ferðin tekur u.þ.b. 3 – 3,5 klukkustundir. Við innritum okkur á Crown Plaza Jordan hótelið þar sem við ætlum að hvíla okkur í sólinni, slaka á og njóta næstu daga.

Morgunverður. Frjáls dagur. Vegna mikillar seltu Dauðahafsins er aðeins hægt að fljóta í hlýju vatni þess, ekki sökkva eða kafa. Leðjan meðfram ströndinni inniheldur mörg steinefni og er talin hafa heilsusamlegan og heilandi ávinning.

Morgunverður. Frjáls dagur.

Morgunverður og frjáls tími fram að hádegi.
Um kl.12:30 sækir rúta hópinn og haldið verður á flugvöllinn. Brottför frá Queen Alia International flugvellinum í Amman kl.16:00. Lending í Vínarborg kl.18:45 að staðartíma. Brottför frá Vínarborg kl.21:00 og lending í Keflavík kl.23:20 að íslenskum tíma.