Töfrar Jórdaníu 2024

Brottför frá Keflavík 2.apríl kl.13:55. Flogið með Lufthansa í gegnum Frankfurt og lent í höfuðborg Jórdaníu, Amman, klukkan 02:20 að staðartíma. Rúta flytur hópinn á Grand Hyatt hótelið í Amman þar sem gist verður í 4 nætur.

Morgunverður er í boði til kl.10:30. Kl.11:30 verður farið í skoðunarferð um Amman. Byrjað verður á að skoða King Abdullah moskuna sem byggð var á níunda áratugnum sem minnisvarði um Abdulla hinn fyrsta. Við heimsækjum rústir rómverska leikhússins, the Citadel borgarvirkið og Umayyad höllina. Komið verður við á fornleifa og þjóðminjasafni og rölt gegnum markaði. Eitt af elstu hverfum Amman, Regnbogastræti, verður skoðað og kíkt í antíkbúðir og skemmtilegar smáverslanir áður en haldið verður til baka á hótelið um kl.17:30. Frjálst kvöld.

Eftir morgunverð keyrum við til Um Qais en sú borg er fræg fyrir svartar basaltrústir frá helleníska tímabilinu til forna. Þaðan sést vel yfir til Golanhæða og að Tiberiusvatni. Haldið til Ajlun en þar má finna eitt best varðveitta hernaðarvirki frá miðöldum Araba. Eftir það höldum við til grísk-rómversku borgarinnar Jerash sem oft er kölluð borg hinna þúsund súlna. Þar eru þær stærstu rómversku rústir sem varðveist hafa hvað best utan Ítalíu og er borgin oft kölluð Pompeii Mið-Austurlanda. Jerash er ein af Decapolisborgunum (10 grískar borgir í mið-Austurlöndum á fornöld) og hefur borgin að nokkru leyti varðveist óspillt. Þar má vel greina hina miklu velmegun fyrri ára á súlnaröðum aðalgötunnar og í hinu fallega Oval Piazza hringleikahúsi. Snúið aftur til Amman á Grand Hyatt hótelið, frjálst kvöld.

Eftir morgunverð leggjum við af stað út í eyðimörkina til að skoða kastalana Al Kharaneh, Qasr Amra og Al Azrag. Þeir voru byggðir af Umayyödum til að hýsa gesti og veiðimenn en Umayyadar voru fyrsta múslima-ættarveldið til að stjórna keisaraveldi kalífadæmisins 661-750 e.Kr. Veggir og gólf kastalanna eru skreytt flísum og mósaík en Amra kastalinn er á heimsminjaskrá UNESCO. Al Azraq var bústaður Arabíu-Lawrence á meðan á arabísku byltingunni stóð. Komið til baka til Amman og gist á Grand Hyatt. Frjálst kvöld.

Eftir morgunverð tökum við ferðatöskurnar með okkur, yfirgefum Grand Hyatt hótelið og leggjum í hann eftir Þjóðvegi Konungsins (e. the King´s highway). Þetta er gömul leið sem full er af sögum af kaupmönnum, hermönnum og pílagrímum sem allir fóru þennan veg fyrir mörgum öldum síðan og tilheyrði þá gömlu silkileiðinni (e. the Silk Road). Fyrsta stoppið okkar er í hinni kristnu borg Madaba sem einnig gengur undir nafninu Mósaíkborgin. Þar skoðum við St.George kirkjuna sem er þekktust fyrir býzantískt mósaík-kort af heilaga landinu sem nær aftur til 6. aldar og sýnir Jerúsalem ásamt öðrum borgum. Eftir Madaba er för heitið í fornleifagarð þar sem við skoðum rústir nokkurra kirkna frá byzönskum tíma en frægust af þeim er Church of the Virgin. Í garðinum er einnig skóli sem kennir varðveislu og viðgerð fornra mósaíkmynda. Eftir þetta er lagt af stað upp á Nebo fjall sem er einn heilagasti staður Jórdaníu með rústum frá 4. til 6. öld. Það er einmitt þar sem Móses á að hafa farið upp og Guð sýndi honum fyrirheitna landið. Móses á einnig að vera grafinn þar. Á björtum degi er hægt að sjá alla leið til Jericho og Jerúsalem. Við heimsækjum klaustrið og Moses Memorial kirkjuna.
Áfram er haldið gegnum Wadi Al Mujib, sem er Miklagljúfur þeirra Jórdaníumanna, þar sem stoppað verður í nokkrar mínútur til að njóta stórfenglegs útsýnis áður en komið er að borginni Kerak. Í Kerak heimsækjum við kastala krossfaranna og kynnumst snilligáfu krossfaranna í hernaði og arkítektúr. Eftir það liggur leiðin inn í stærstu eyðimörk Jórdaníu, Wadi Rum, þar sem mikil ævintýri bíða okkar. Wadi Rum er með stórkostlegu eyðimerkurlandslagi og einstaka náttúrufegurð. Inni í eyðimörkinni hittum við Bedúína og förum með þeim í jeppasafarí um eyðimörkina fram að sólsetri. Eftir sólsetur fáum við kvöldverð í Bedúínatjaldi og gistum í Rum Oasis Luxury Camp, 4 stjörnu tjaldhóteli í miðri eyðimörkinni. Upplifun sem ekki allir hafa prufað.

Eftir morgunverð verður haldið til borgarinnar Beida, sem einnig er þekkt sem Litla Petra. Þarna héldu Nabatear veislur og skemmtu gestum sínum til forna. Seinnipartinn er haldið áfram til Petru og tékkað inn á hótel The Old Village, 5 stjörnu hótel.

Eftir morgunverð er haldið af stað að skoða Petru; „hina rósrauðu borg, helmingi eldri en tíminn sjálfur“ eins og sagt er. Borgin var byggð af Nabateumönnum fyrir 2000 árum sem höfuðborg þeirra. Borgarrústirnar eru hönnunarundur, byggðar voru úr mislitum steinum, sem vakið hafa hrifningu um heim allan. Við hefjum ferðina á hestbaki fyrir þá sem það vilja en göngum síðan það sem eftir er dags um borgina sem liggur niður í sprungu (Siq) milli tveggja slútandi kletta. Endað verður á því að skoða hið fræga minnismerki “The Treasury”.
Að lokum er haldið til baka á hótelið Hayad Zaman í Petra. Frjálst kvöld

Eftir morgunverð er farið af stað til Aqaba; glugga Jórdaníu við Rauðahafið í jaðri Aqaba-flóa. Aqaba er umkringt háum eyðimerkurfjöllum og því notalegt loftslag allt árið um kring. Svæðið er vel þekkt fyrir lúxushótel og strandsvæðin. Þeir sem hafa áhuga á köfun eða snorkli geta notið þess að skoða eitt best varðveittasta kóralrif heims. Frjáls dagur í Aqaba, gist í 2 nætur á Al Manara Luxury Collection með morgunverði inniföldum.

Morgunverður. Frjáls dagur til að njóta í Aqaba.

Morgunverður. Eftir morgunverð verður haldið í átt að Dauðahafinu, lægsta yfirborðspunkti jarðar. Ferðin tekur u.þ.b. 3 – 3,5 klukkustundir. Við innritum okkur á Crown Plaza Jordan hótelið þar sem við ætlum að hvíla okkur í sólinni, slaka á og njóta. Vegna mikillar seltu Dauðahafsins er aðeins hægt að fljóta í hlýju vatni þess, ekki sökkva eða kafa. Leðjan meðfram ströndinni inniheldur mörg steinefni og er talin hafa heilsusamlegan og heilandi ávinning.

Morgunverður. Frjáls dagur til að njóta.

Um kl.13 sækir rúta hópinn og haldið verður á flugvöllinn. Brottför frá Queen Alia International flugvellinum í Amman kl.16:00. Lending í Vínarborg kl.18:45 að staðartíma. Brottför frá Vínarborg kl.21:00 og lending í Keflavík kl.23:20 að íslenskum tíma. Flogið með Austrian Airlines (OS).