Hjólað frá Saígon til Bangkok

Dagar og nætur í Saígon þar sem enn ríkir sá andblær sem gerður var frægur í fjölmörgum myndum um Víetnamstríðið og ekki minni ævintýri í Phnom Penh þar sem við mætum hinum ljúfu khmerum sem byggja Kambódíu og sögu Rauðu khmeranna sem nær rústuðu Kambódíu í lok síðustu aldar. Og ekki gerast ævintýrin minni í Siem Reap bænum þar sem lengst verður dvalið meðan rústir Angkor eru kannaðar.

Þaulreyndir áfangar í hnitmiðaðri og vandaðri ferð með framandi áskoranir og stórum ævintýrum.

Þessi kröftuga og kjarnmikla ferð er sannkölluð landkönnun með átökum og ævintýrum við hæfi og getu allra fullfrískra.

Ferðin hefst í Víetnam þar sem alls verður dvalið í 6 daga og gist bæði í stórborginni Saígon, sem í dag gengur undir nafninu Hoh Chi Minh City og eins verður dvalið á þremur mismunandi stöðum við Mekongfljót. Farin verður landleiðin og að hluta til siglt upp Mekong og inn í Kambódíu, sömu leið og farin var af kaupmönnum á leið til Angkor þegar ríkið var sem öflugast á árunum 802 til 1443 en fá ef engin ríki hafa viðhaldið styrk sínum og valdi eins lengi.

Borgin Saígon er bæði ævintýraleg og sérlega elegant með minjum um nýlendutíma Frakka og iðandi asísku götulífi,hressilegu næturlífi og stórkostlegum mat. 
Árósar Mekong eru ævintýraleg svæði með frábærum hjólaleiðum og fjölbreyttum upplifunum.

Í Kambódíu verður dvalið rúmlega viku, fyrst í höfuðborginni Phnom Penh þar sem “Killing Fields” og fangabúðir Rauðu khmeranna verða skoðaðar. Þaðan verður svo flogið til Siem Reap þar sem lengsta vistin verður í Kambódíu því undur Angkor verða ekki skoðuð á einum dagi. Þó svo að ferðalangar eigi þrjá góða daga í kringum Angkor dugir það engan veginn til að skoða rústir veldis sem hýsti milljónir íbúa og byggði mannvirki sem enn í dag eru þau stærstu sem reist hafa verið í nafni einhverra trúarbragða. Við kynnumst magnaðri arfleifð þjóðar sem tilbað bæði Búdda og hina 1200 guði hindúa. 

Dvalið verður Siem Reap bænum við Angkor og sá bær býr ekki síður yfir ævintýrum en rústir Angkor. Þarna finnast næturgaldrar inn á smart börum og diskótekum framandi markaðir og fleira í þessari sérstöku súpu af sveitalífi og túrisma.

Hjólatúrar hvers dag eru frá 30-50 km og er hægt að panta rafmagnshjól ef fólk óskar.  Fylgdarbíll fer í humátt á eftir hjólreiðafólki og vanir leiðsögumenn og þaulvanur fararstjóri Úrval Útsýn leiðir hópinn áfram af öryggi.

Áfangar: 2 nætur í Saígon, 3 nætur á árósum Mekong, 2 nætur í Phnom Penh, 3 nætur í Siem Reap, 2 nætur í sveitum Kambódíu á leið til Taílands og að lokum 2 nætur í Bangkok.

Hafðu samband við serferdir@uu.is ef þú vilt nánari upplýsingar og nákvæma dagskrá.