Grískt eyjahopp og sigling um Miðjarðarhafið

Flug frá Keflavík til Verona með Lufthansa og Air Dolomiti kl 01:10-12:35. Flogið er frá Keflavík með stoppi í Munchen og þaðan er haldið áfram til Verona. Við komuna í Verona bíður rúta sem keyrir okkur á Hotel Giberti en þarf verður gist næstu 2 nætur.

Margir tengja Verona helst við hina óborganlegu sögu af forboðinni ást Rómeós og Júlíu úr smiðju Shakespears og linna ekki látum fyrr en þeir standa við svalirnar þar sem hið ástfangna par kallaðist á. Ekki amaleg tenging þar en Verona býður nú til dags upp á ótalmargt fleira með fjölda skemmtilegra torga, margsnúnar og sniðugar götur, aragrúa stórra og smárra verslana og enn fleiri matstaði og kaffihús. Og sagan liggur í hverju skoti en fremst í flokki fer hið stóra rómverska hringleikahús sem varðveist hefur ótrúlega vel í tæp 2000 ár. Þar eru enn sett á svið leikrit og ótal tónleikar. Til viðbótar má nefna flölmargar kirkjur með ólíkum stílbrögðum og upplagi, magnaðar brýr yfir borgarfljótið Adige, listasöfn og gallerí, gæðavín á hverju strái og ítalska eldhúsið í öndvegi.

Fljótlega eftir morgunverð kemur rúta að sækja okkur og keyrir til Feneyja þar sem gengið verður um borð á Norwegian Dawn. Akkerum verður síðan lyft kl 17:00 og sigling formlega hefst.

Við bæinn Kotor í Svartfjallalandi er nauðsynlegt að kasta akkerum nokkuð frá ströndinni og sigla í land með smærri bátum. Kotor er lítill og fallegur bær með aðeins um 13.000 íbúa. Hann var lengi undir yfirráðum Feneyinga enda er staðurinn við mynni Adríahafsins, sem var lífæð Feneyska sjóveldisins. Feneyingar byggðu mikil virki til að verja vígi sitt sem enn gnæfa yfir nágrennið. Það sem togar farþega skemmtiferðaskipa til bæjarins er hin einstaka fegurð og yfirbragð bæjarins og ekki síst gamli bærinn. Byggðin er á heimsminjaskrá UNESCO og yfirlýstur ómetanlegur sögulegur fjarsjóður Suður-Evrópu. Skipið fer úr höfn kl 20:00

Yfir nóttina verður siglt til grísku eyjarinnar Korfu þar sem lagst verður að kl10:00 Korfu er næst stærst hinna Jónísku eyja við vesturströnd Grikklands og spannar um 600 ferkm. Höfuðstaður eyjarinnar, sem einnig heitir Korfu, er á austurströndinni og í raun mun nær Albaníu en Grikklandi. Byggð á Korfu er ævaforn og eyjunnar er víða getið í forngrískum heimildum. T.d. getur sagnaritarinn
Þúkídades þess að skipafloti Korfu hafi verið jafn öflugur og borgaríkjanna Aþenu og Korinþu á 5. öld fyrir Krist. Yfir borginni gnæfa miklar kastalabyggingar sem bera vitni um varnir gegn ásælni sjóræningja og Ottomanveldisins. Bretar lögðu eyjuna undir sig í lok Ottomanveldisins en hún losnaði undan bresku krúnunni um hálfri öld síðar. Gamli bærinn hefur verið á heimsminjaskrá UNESCO síðan 2007. Siglingin heldur áfram kl. 16:30.

Santorini er einhver frægasta smáeyja heims. Hún stendur á barmi risastórar eldfjallakeilu, sem er mest undir sjávarmáli. Snyrtileg hvítmáluð húsin eru í algerri andstöðu við eldfjallaöskuna og enda þótt eyjan sé smá er hún stærri en margan grunar. Stærsta þorpið er Oia þaðan sem ófáar myndir af hvítum húsum hafa heillað margan ferðalanginn, hér er forvitnileg vínrækt og mannvistaleifar frá bronsöld í Akritiri. Þeir sem kjósa, eiga þess kost að ganga upp á 300 hundruð tröppuþrep þar sem sárþreyttir asnar geta létt gönguna en einnig má komast þangað upp með kláfi. Skipið mun liggja við akkeri á flóanum og farþegar verða fluttir í land með smærri bátum. Skipið fer úr höfn kl 22:00

Þennan dag sækjum við heim eyjuna Mykonos sem er um 85 ferkm að stærð og íbúafjöldinn rúm 10.000. Ferðamennska er helsta atvinnugreinin og eyjan er víðfræg fyrir skemmtan og fjörugt næturlíf. Eyjan er oft uppnefnd Eyja vindsins sem oft er kærkominn þegar sólin er hæst á lofti og hitinn nærri 40 stigum. Sem annars staðar í Grikklandi, á Mykonos sér langa sögu og sem ekki síst vegna endalausum skiptum á yfirboðurum og ríkjasamböndum. Á 4. áratugnum varð Mykonos griða- og tískustaður frægra listamanna, pólitíkusa og ríkra Evrópubúa en á síðustu áratugum hafa þúsundir ferðamanna leitað til Mykonos eftir sól, ströndum og litríku skemmtanalífi. Skipið fer úr höfn kl. 15:00.

Skipið leggst snemma morguns við höfn Argostoli kl 08:30. Argostoli var einu sinni þekkt fyrir glæsilegan arkitektúr frá Feneyjum. En árið 1953 var stór og mikill jarðskjálfti sem nánast eyðilagði öll þau mannvirki sem byggð höfðu verið á eyjunni. Heilu þorpin þurkuðust hreinlega út og yfir 100 þúsund manns yfirgáfu eyjunna. Argostoli er í dag líflegur bær þar sem búa yfir 10 þúsund manns árið um kring, verslanir, veitingastaðir og fjölmörg kaffihús eru í bænum. Höfnin hefur mikið aðdráttarafl en þar er oft hægt að sjá Caretta skjaldbökur en sjómenn kasta óæskilegum afla frá borði sem dregur þær að höfninni. Yfirleitt hægt að sjá þær snemma morguns. Skipið fer frá höfn kl 15:00.

Borgin Dubrovnik í Króatíu er ein mest sótta ferðamannaborg Miðjarðarhafslanda og var sett á heimsminjaskrá UNESCO árið 1979 – og ekki að ósekju. Lega landins á strönd Adríahafsins skóp mikla útgerð, verslun og auðlegð þegar á 15. og 16. öld. Gamli bærinn er sér á báti og leitun að betur varðveittri miðaldaborg. Hún varð þó illa úti í borgarastyrjöldinni við upplausn Júgóslaviu en á síðustu áratugum hefur borginni verið komið í upprunalega mynd. Hér verður Norwegian Dawn í höfn frá kl 07:00-13:00.

Skipið leggst við bryggju snemma morguns kl 07:00 Í Fenyjum. Farþegar verða keyrðir á Hotel Bonvecchiati en hér verður gist næstu 3 nætur.
Feneyjar, borgin sökkvandi, er með sérkennilegustu borgum Evrópu og jafnvel þótt víðar væri leitað. Feneyjar eru oft kallaðar drottning Adríahafsins, liggja í Feneyjarlóni við Adríahafið á norðaustur Ítalíu og samanstanda af 118 eyjum sem eru ævintýri líkast. Hér eru síki eða vatnsvegir á milli hinna mörgu smáeya og eru húsin á stólpum.
Það er einstök upplifun að ferðast um síki borgarinnar á gondólum og virða fyrir sér mishrörlegar byggingar þar sem þær rísa upp úr vatninu og kjallararnir oft í hálfu kafi
Markúsartorgið og byggingarnar umhverfis það stórkostlega torg, eru í hnotskurn það sem ferðamenn vilja gjarnan sjá þegar komið er til Feneyja.
Helstu byggingar á Markúsartorginu eru basilikan sem kennd er við heilagan Markús, San Marco; Hertogahöllin “Palazzo Ducale” og klukkuturninn “il Campanile” sem hrundi 1902, en var svo endurbyggður. Þetta eru allt byggingar sem voru reistar á bilinu 11. – 15. öld, þó sumar hafi þurft að endurbyggja eitthvað í aldanna rás.
Eftir hádegi 25. ágúst sækir rúta farþega og keyrir upp á Verona flugvöll. Flug með Air Dolomiti og Lufthansa til Keflavíkur með stoppi í Frankfurt. Kl: 18:45-23:30.