Gardavatn og nágrenni

Ferðin hefst með flugi Icelandair til Mílanó á Ítalíu þann 30,maí. Þar bíður rútan eftir okkur og við tekur um 2ja tíma ferð til Garda-vatns. Við setjum okkur niður í bænum Peschiera við suð-austurströnd Gardavatns. Peschiera stendur a gömlum merg og gegndi áður mikilvægu hlutverki varnarvirkis á mektardögum ítölsku borgríkjanna og kastalinn á hólma í bæjarfljótinu Mincio ber þess merki. Þá er gamli bærinn umlukinn gamalli víggirðingu frá tímum yfirráða Feneyja og þessi virkisveggur er á verndarlista UNESCO um mikilvægar sögulegar minjar. Nú er þessi 10.000 manna bær fyrst og fremst þjónustumiðstöð og vinsæll ferðamannastaður.

Ferð að Iseo-vatni (75 km) sem liggur í skjóli Alpanna vestur af Gardavatni. Iseovatn er minna en Gardavatn en þykir af ýmsum slá við fegurð stóru systur. Ferðin hefst með heimsókn í Iseo-bæ og það er sem stigið sé aftur tímann þegar leiðin liggur um aldagömul stræti sem liggja í þvers og kruss. Gangan endar uppi við Oldofredi-kastala sem er forvitnilegur (aðgangur ekki innifalinn). Eftir hádegishlé verður farið í siglingu út í einstaklega fallega eyju, Monte Isola, sem mun vera stærsta eyjan af öllum slíkum í stöðuvötnum Evrópu! Það er skemmtileg áskorun að ganga upp að kirkjunni sem trónir uppi á efsta tindi eyjunnar (600 m.). Þegar aftur er komið í land verður haldið heim á leið en komið verður við í vínþorpinu Franciacorta og smakkað á guðaveigum heimamanna.

Þennan dag nýtum við til að kynnast hinu yndislega héraði umhverfis Garda. Fyrst verður ekið vestur með vatninu upp til bæjarins Limone sem sumir telja mesta túristastað við Gardavatn og umferðin er eftir þvi. Þaðan verður haldið áfram í norður uns komið verður að bænum Riva del Gard við nyrsta bakka Gardavatns. Riva státar af því að vera vinsælasti ferðamannastaður Norður-Ítalíu! Saga bæjarins er mjög mögnuð en Riva var áningarstaður ferðamanna á fyrri tíð sem lögðu á sig erfiða ferð yfir Alpafjöll. Áfram heldur ferðin og nú verður ekið suður með austurströnd Gardavatns sem leið liggur til hins ævintýralega bæjar Malcesine, þar sem hinn mikilfenglegi Scaliger kastali stendur. Kastalinn liggur frá gamla bænum við ströndina upp í fjallshlíðar og þar er merkilegt safn og frægt herbergi sem séníið Göthe mun hafa búið í um skeið. Á heimleið gefst kostur að að smakka ólívuólíu ásamt smáréttum.

Fyrir dyrum stendur skoðunarfeð til Verona þar sem sagan af elskendunum Rómeó og Júlíu varð innblástur Shakespeare að samnefndu leikriti. Hér eru svalirnar þar sem Júlía stóð og meðtók og svaraði ástinni sinni sem stóð á götunni. Við heimsækjum einnig leifar hins stórfenglega hringleikahúss Rómverja við Piazza Brá sem enn þjónar hlutverki sínu sem fyrirtaks heimili stórkonserta og leikrita. Þá kíkjum við í verslanir á Via Mazzini sem er umkringd sögunni, listmunaverslunum, galleríum og litríku götulífi. Eftir hádegið verður haldið í vínsmakkanir í hinu annálaða rauðvínshéraði Valpolicella en þar hefur verið vínrækt í um 1500 ár. Valplocella-vínin eru fræg af endemum og kostur þeirra er m.a. sá að þeirra má njóta aðeins nokkurra vikna frá uppskerutíma. Einnig verða á veginum fleiri vín af sama meiði, m.a. extra sæt desertvín.

Frá hótelinu í Peschiera til ævintýraborgarinnar Feneyja er aðeins tæplega 2ja tíma akstur og því mikilvægt að nýta þetta tækifæri að skoða hina sögufrægu hálfsökkvandi borg sem þekkt er sem drottning Adríahafsins. Siglt verður um hin frægu síki sem koma í stað vega og stræta í gömlu borgareynni. Allir þjónustuaðilar, lögregla, slökkvilið, bréfberar og öskukarlar, fara um í bátum og prömmum. Siglt verður m.a. um Stóra-síki (Grand Canal) og undir Rialto-brúna og meðfram aldagömlum glæsihúsunum sem slúta mörg hver yfir vatnsbakkana. Hvarvetna blasa við ótrúlegar tæknilegar lausnir – gamlar og nýjar – til að þjóna þessu einstaka borgarstæði. Feneyingar voru ekki eingöngu eitt mesta flotaveldi á miðöldum og einhver ríkasta borg heims, þeir voru líka hugvitssamir. Þeir byltu listinni að framleiða gler, gleraugu og bækur og til þeirra má rekja útgáfu bókakilja sem gerði fleirum fært að kaupa bækur á viðráðanlegum kjörum. Og loks gefst tækifæri að koma við á Caffe Florian, líklega heimsins elsta kaffihúsi.

Síðustu tveir dagar ferðarinnar eru frjálsir og ekki úr vegi að kíkja um á dvalarstaðnum og kannski busla eða fara í bátsferð á Gardavatni.